ডেৰ বছৰৰ পাছত পুনৰ ওকালতিলৈ উভতি যাব ‘খিলঞ্জীয়া নেতা’ উপমন্যু হাজৰিকা
যোৱা প্ৰায় দুটা বছৰ ধৰি খিলঞ্জীয়াৰ অধিকাৰ আৰু সুৰক্ষাৰ হকে মাত মাতি অহা প্ৰব্ৰজন বিৰোধী মঞ্চৰ আহ্বায়ক উপমন্যু হাজৰিকাই শেহতীয়াকৈ অৱতীৰ্ণ হৈছিল লোকসভা নিৰ্বাচনৰ ৭ নং গুৱাহাটী সমষ্টিৰ প্ৰাৰ্থী হিচাপে।
যিহেতু নিৰ্বাচনী প্ৰচাৰৰ অন্ত পৰিল এতিয়া স্বাভাৱিকতে প্ৰশ্ন উঠে পুনৰ উচ্চতম ন্যায়ালয়লৈ উভতি গৈ উকালতি কৰিব নেকি জ্যেষ্ঠ অধিবক্তা উপমন্যু হাজৰিকাই?
হয়, নিৰ্বাচনী প্ৰচাৰৰ অন্ত পৰাৰ পাছত প্ৰায় এসপ্তাহ ঘৰতে জিৰণি লৈ কাইলৈ দিল্লীলৈ উভতি যাব হাজৰিকা। নৰ্থ ইষ্ট নাওক এই কথা জনাইছে হাজৰিকাই।
‘’মই কাইলৈ দিল্লীলৈ যাম। মঞ্চৰ হৈ কাম কৰি থকাৰ বাবে আৰু নিৰ্বাচনী প্ৰচাৰৰ ক্ষেত্ৰত জড়িত হৈ থকাৰ বাবে বহুবছৰ ধৰি ওকালতি কৰিব পৰা নাই। এতিয়া গৈ মই প্ৰেক্টিছ আৰম্ভ কৰি পইচা-পাতি অলপ ঘটিব লাগিব, নিৰ্বাচনত বহু খৰচ হ’ল সেই খৰচ উলিয়াব লাগিব।‘’ নিৰ্বাচনৰ পাছৰ দিনকেইটা কেনেদৰে কটাইছে বুলি সোধা এক প্ৰশ্নৰ উত্তৰত এইদৰে কয় হাজৰিকাই।
ইপিনে, সংগঠনৰ কাম-কাজত ওত:প্ৰোতভাৱে জড়িত হৈ পৰা হাজৰিকাই দীৰ্ঘ সময় ধৰি ওকালতি কৰা নাই বুলিও মন্তব্য কৰে হাজৰিকাই।
তেওঁ কয়, ‘’২০১৮ চনটো মই ওকালতিৰ প্ৰেক্টিছ প্ৰায় নাই কৰা বুলি ক’লেও ভুল কোৱা নহ’ব। এটাৰ পাছত আন এটা আন্দোলন কৰা হৈছিল খিলঞ্জীয়াৰ অধিকাৰ সুৰক্ষাক লৈ।‘’
তদুপৰি, নিৰ্বাচনৰ ফলাফলক লৈ কিমান দূৰ আশাবাদী বুলি আমাৰ সাংবাদিকে সোধা এক প্ৰশ্নৰ উত্তৰত সাংসদ হোৱা বাবে আশাবাদী নহয় বুলি মন্তব্য কৰে হাজৰিকা।
‘’ৰাইজৰ আবেগ আছে। আমাৰ কামখিনি হ’ব লাগে। আমাক সংৰক্ষণ দিয়ক, সুৰক্ষিত কৰক, বিদেশীমুক্ত অসম, এইখিনিয়েই আমাৰ মূল দাবী। সাংসদ, বিধায়ক হোৱাটো ইমান এটা ডাঙৰ কথা নহয়।‘‘ নিৰ্বাচনৰ পূৰ্বে তেওঁক সাংসদ হিচাপে নিযুক্ত কৰিলে সংসদত খিলঞ্জীয়াৰ অধিকাৰৰ হকে মাত মতাৰ শ্ল’গান দিয়া হাজৰিকাৰ এই মন্তব্যই বিশেষ তাৎপৰ্য্য বহন কৰিছে।
প্ৰশ্ন হয়,‘’নিশ্চিত পৰাজয়’’ৰ উমান পাই ফলাফলৰ পূৰ্বেই দিল্লীলৈ গৈ পুনৰ ওকালতিত ব্যস্ত হ’ব বিচাৰিছে নেকি উপমন্যু হাজৰিকাই?