হাগ্ৰামাক উভতি ধৰিলে ইউপিপিএলে; ভাতৃঘাতী সংঘৰ্ষৰ মাষ্টাৰ মাইণ্ড বুলি অভিহিত বিপিএফ নেতাগৰাকীক

বিপিএফৰ সভাপতি তথা বিটিচিৰ প্ৰাক্তন কাৰ্যৱাহী সদস্য হাগ্ৰামা মহিলাৰীয়ে বৃহস্পতিবাৰে ২০ সংখ্যক বিটিচি চুক্তি দিৱসত দিয়া কেতবোৰ মন্তব্যৰ শুকুৰবাৰে প্ৰতিক্ৰিয়া ব্যক্ত কৰিছে প্ৰমোদ বড়ো নেতৃত্বাধীন ইউপিপিএল দলৰ মুখপাত্ৰ আৰু বিটিচিৰ কাৰ্যবাহী সদস্য ৰঞ্জিত বসুমতাৰীয়ে ৷

তেওঁ লগতে হাগ্ৰামা মহিলাৰীৰ বিৰুদ্ধে বহু বিস্ফোৰক মন্তব্যও আগবঢ়াইছে।

কোকৰাঝাৰ চহৰৰ কদমতলাস্থিত ইউপিপিএল দলৰ মুখ্য কাৰ্যালয়ত আয়োজিত এখন সংবাদ মেলত বসুমতাৰীয়ে দলৰ হৈ মন্তব্য প্ৰকাশ কৰে৷

হাগ্ৰামা মহিলাৰীলৈ বসুমতাৰীৰ প্ৰশ্ন যে ২০০৩ চনৰ ১০ ফেব্ৰুৱাৰীত স্বাক্ষৰিত হোৱা বিটিচি চুক্তিৰ পিছত বিটিচিৰ শাসন ক্ষমতালৈ অহা বিপিএফে ১৯৯৩ চনৰ ২০ ফেব্ৰুৱাৰীত সম্পন্ন হোৱা বিএচি চুক্তি দিৱস কিয় পালন নকৰিলে?

আনহাতে, হাগ্ৰামাই মিছাই পৃথক বড়োলেণ্ড পোৱা বুলি কৈছিল বুলি উল্লেখ কৰি বসুমতাৰীয়ে লগতে কয় যে বিটিআৰ চুক্তিৰ দ্বাৰা সুকীয়া সঞ্চালকালয় হ’ল। বড়ো ভাষা অসমৰ সহযোগী চৰকাৰী ভাষাৰ মৰ্যদা পালে৷ বিধানসভাতো বড়ো ভাষাই স্থান পালে৷ বিটিআৰৰ বাহিৰৰ বড়ো সকলৰ বাবে আৰ্থ-সামাজিক,ৰাজনৈতিক বিকাশৰ বাবে বিকেডব্লিউএচি হ’ল।

ইপিনে, বিটিআৰ ধ্বংসৰ প্ৰসংগত হাগ্ৰামাক উভতি ধৰি বসুমতাৰীয়ে কয় যে প্ৰাক্তন বিএলটি সকলক কেৱল মদ, ভাং,জুৱাত ব্যস্ত ৰাখিলে। বিআৰটিএফক হাতৰ মুঠিত ৰাখি অসামাজিক কাৰ্য-কলাপ, বিশৃংখল সৃষ্টি কৰিছে।    

বসুমতাৰীয়ে এক বিস্ফোৰক অভিযোগ আনি কয় যে বড়ো-অবড়ো কেবল হাগ্ৰামাৰ বাবেই হৈছে৷ তেওঁ এনে পাৰ্থক্য আনি উন্নয়নমুলক কাম স্তব্ধ কৰিছিল৷ তেওঁ ভাতৃঘাতী সংঘৰ্ষৰ মাষ্টাৰ মাইণ্ড৷

ইউপিপিএলৰ নেতাগৰাকীয়ে কয় যে বিটিআৰত নতুন সংগঠন সৃষ্টিত হাগ্ৰামাৰ হাত আছে। হাগ্ৰামাৰ সোৱেঁ-বাৱে থকা সকলেই নতুন ছাত্ৰ সংগঠন সৃষ্টিত হাত উজান দিয়া বুলিও তেওঁ কয়৷

ইউপিপিএলে ২০সংখ্যক বড়োলেণ্ড দিবসত বিৰোধী বিপিএফৰ মন্তব্যত দুখ প্ৰকাশ কৰে৷

বিপিএফৰ এগৰাকী নেতাই মিছাইলমেন ড°এপিজে আব্দুল কালাম, ভূতপুৰ্ব প্ৰধানমন্ত্ৰী অটল বিহাৰী বাজপায়ী ,নৰেন্দ্ৰ মোডীক অপমান কৰা কাৰ্যৰ গৰিহণা দি দোষী ব্যক্তিক গ্ৰেপ্তাৰৰ দাবী জনায়৷