উপ নিৰ্বাচন: গোবিন্দ বসুমতাৰীৰ নেতৃত্বত ইউ পি পি এলৰ পাঁচজনীয়া নিৰ্বাচন সমিতি গঠন

উপ নিৰ্বাচনৰ দিন ঘোষণা হোৱাৰ পিছতে ইউ পি পি এলে দলীয় স্থিতি মজবুত কৰা লগতে উপ নিৰ্বাচনত জনমত থকা প্ৰাৰ্থী প্ৰক্ষেপ কৰিবলৈ সম্পূৰ্ণ সাজু হৈছে।

কোকৰাঝাৰৰ চান্দামাৰীস্থিত বডোফা সাংস্কৃতিক প্ৰকল্পত কালিৰে পৰা আৰম্ভ হোৱা ইউ পি পি এলৰ দুদিনীয়া দলীয় বৈঠক আজি অন্ত পৰে।

ইউ পি পি এলৰ কাৰ্যকৰী সভাপতি ৰৌনগৌৰা নাৰ্জাৰীয়ে আঁত ধৰা গুৰুত্বপূৰ্ণ দলীয় বৈঠকত অংশগ্ৰহণ কৰি দলৰ সভাপতি তথা বি টি আৰ মুখ্য কাৰ্যবাহী সদস্য প্ৰমোদ বড়োৱে সংবাদ মাধ্যমৰ আগত কয় যে বি টি আৰত দুটাকৈ সমষ্টিত উপ নিৰ্বাচনৰ বাবে ইউ পি পি এলে সম্পূৰ্ণ সাজু হৈছে।

গুৰুত্বপূৰ্ণ বৈঠকত ইতিমধ্যে বি টি আৰৰ উপ মুখ্য তথা বিধায়ক গোবিন্দ বসুমতাৰীক অধ্যক্ষ হিচাবে লৈ দি পাঁচজনীয়া নিৰ্বাচন সমিতি গঠন কৰা হৈছে।

দলৰ জনমত থকা প্ৰাৰ্থীৰ নিৰ্বাচনৰ প্ৰক্ৰিয়া চলি আছে আৰু কম সময়ৰ ভিতৰতে গোঁসাইগাঁও আৰু তামুলপুৰ বিধানসভা সমষ্টিৰ বাবে প্ৰাৰ্থী ঘোষণা কৰা হব বুলি প্ৰমোদ বড়োৱে প্ৰকাশ কৰে।

ইতিমধ্যে দুদিনীয়া গুৰুত্বপূৰ্ণ দলীয় বৈঠকত অংশগ্ৰহণ কৰা সকলো কাৰ্যবাহী সদস্য, পৰিষদীয় সদস্য সকলক সমষ্টিবাসী ৰাইজৰ সৈতে যোগাযোগত ৰাখি কাম কৰিবলৈ নিৰ্দেশ দিয়া হৈছে বুলি বড়োৱে কয়।

আনহাতে প্ৰমোদ বড়োয়ে পূৰ্বৰ বি পি এফ সভাপতি হাগ্ৰামা মহিলাৰীৰ নেতৃত্বাধীন চৰকাৰে ৰাইজৰ বাবে একো উন্নয়নৰ কাম কৰা নাই বুলি হাগ্ৰামাক সমালোচনা কৰে।