বেইজিঙক কেঁকোৰা চেপাঃ চীনৰ ১১টা কোম্পানী ব্লেক লিষ্টেড কৰিলে আমেৰিকাই
বিপদে যেন বেৰি ধৰিছে চীনক।
ভাৰতৰ সৈতে সীমাক লৈ সংঘাতত লিপ্ত হোৱাৰ পিছতে যেন চীনৰ প্ৰতি তেৰেচীয়া দৃষ্টি নিক্ষেপ কৰিছে বিশ্বৰ ভালে কেইখন দেশে।
ক’ৰ’ণা ভাইৰাছৰ সংক্ৰমণকলৈ আমেৰিকাৰ সৈতে সংঘাত চলি থকা চীনক যেন এইবাৰ কেকোঁৰা চেপা দিবলৈ সাজু হৈছে আমেৰিকা।
কিছুদিন পূৰ্বে আমেৰিকাই চীনৰ কেইবাটাও কোম্পানীৰ বিৰুদ্ধে কঠোৰ পদক্ষেপ গ্ৰহণ কৰাৰ পিছত এই বাৰ চীনৰ ১১ টাকৈ কোম্পানী ব্লেক লিষ্টেড কৰাৰ বাবে অগ্ৰসৰ হৈছে দেশ খন।
মঙলবাৰে আমেৰিকাৰ বাণিজ্য দপ্তৰৰ সচিব উইলবাৰ ৰ’ছে প্ৰকাশ কৰা মতে পশ্চিম চীনত সংখ্যালঘু উইঘূৰ সম্প্ৰদায়ৰ লোক সকলৰ ওপৰত চীনে চলাই থকা অত্যাচাৰৰ প্ৰতিবাদ কৰিয়েই আমেৰিকাই চীনৰ ১১ টাকৈ কোম্পানীক ব্লেক লিষ্টেড কৰাৰ সিদ্ধান্ত লয়।
উক্ত কোম্পানী কেইটাই উইঘূৰ সম্প্ৰদায়ৰ লোকক শ্ৰমিক হিচাবে নিয়োগ কৰি নানান ধৰণৰ নিৰ্যাতন চলাই অহা বুলি আমেৰিকাই অভিযোগ কৰিছে।
আমেৰিকাই ব্লেক লিষ্টেড কৰা কোম্পানী ১১টাৰ ভিতৰত অধিকাংশ কোম্পানীয়েই বস্ত্ৰ কোম্পানী।
ব্লেক লিষ্টেড কৰা কোম্পানীৰ ভিতৰত আংচেং অ’ ফিল্ম টেক,টমি হিল ফিগাৰ,জেন’মিক্স আদি কোম্পানী আছে।
চীনৰ চৰকাৰে দেশখনৰ উইঘূৰ মুছলমান লোকৰ ওপৰত অকথ্য নিৰ্যাতন চলোৱাৰ খবৰ সংবাদ মাধ্যমত প্ৰচাৰ হৈ আহিছে।