আামেৰিকাত শিহৰণকাৰী জাহাজ দুৰ্ঘটনাঃ ছয়জন শ্ৰমিকৰ মৃত্যুৰ সন্দেহ
আমেৰিকাৰ বাল্টিম’ৰৰ ফ্ৰান্সিছ স্কট কী দলঙত মঙলবাৰে সংঘটিত হয় এক ভয়াৱহ জাহাজ দুৰ্ঘটনা। এই দুৰ্ঘটনাত ছয়জন লোকৰ মৃত্যুৰ সন্দেহ কৰা হৈছে। নিৰুদ্দিষ্ট লোকসকলৰ এই সংঘৰ্ষত মৃত্যু হোৱা বুলি ধৰি লৈ কৰ্তৃপক্ষই উদ্ধাৰ অভিযান বন্ধ কৰি দিছে।
সম্পূৰ্ণৰূপে ভাৰতীয় ক্ৰুৰ দ্বাৰা পৰিচালিত কণ্টেইনাৰ জাহাজখনে ক্ষণিকৰ বাবে নিয়ন্ত্ৰণ হেৰুৱাই দলঙত খুন্দা মাৰে। ২২ জন ক্ৰুৰ আটাইকেইজনেই সুৰক্ষিত থকাৰ পৰিৱৰ্তে দলংখনৰ মেৰামতিৰ কামত নিয়োজিত ছয়জন শ্ৰমিক নিৰুদ্দেশ হৈছে।
মাজনিশাৰ আশে-পাশে জাহাজখনে দলংখনত খুন্দা মৰাৰ সময়ত দলংখনৰ মেৰামতিৰ কাম কৰি থকা এটা নিৰ্মাণকাৰী দলৰ অংশ আছিল নিৰুদ্দিষ্ট লোকসকল। স্থানীয় কৰ্তৃপক্ষই সদৰী কৰা অনুসৰি পানীৰ গভীৰতা আৰু সোঁতৰ বাবে উদ্ধাৰকাৰী ডুবাৰুসকল পানীৰ তলত দীৰ্ঘসময় ধৰি থকাত অসুবিধাৰ সন্মুখীন হয়।
সেয়ে তেওঁলোকে অনুসন্ধান অভিযান সামৰিবলৈ বাধ্য হোৱা বুলি জানিবলৈ দি কৰ্তৃপক্ষই লগতে নিৰুদ্দিষ্ট লোকসকলক জীৱিত ৰূপত উদ্ধাৰ কৰাৰ কোনো সম্ভাৱনা নাই বুলি উল্লেখ কৰে।
আমেৰিকাত থকা ভাৰতীয় দূতাবাসে ভয়ংকৰ দুৰ্ঘটনাক শোক প্ৰকাশ কৰাৰ লগতে সংঘৰ্ষৰ ফলত ক্ষতিগ্ৰস্ত যিকোনো ভাৰতীয় নাগৰিকৰ বাবে হেল্পলাইন জাৰি কৰিছে।