কৰ’না ভাইৰাছৰ আতংক: আমেৰিকাত এবছৰৰ বাবে বন্ধ স্কুল-কলেজ!
আমেৰিকাত কৰ’না ভাইৰাছৰ দ্ৰুত সংক্ৰমণলৈ লক্ষ্য কৰি সম্পূৰ্ণ এটা শৈক্ষিক শিক্ষাবৰ্ষৰ বাবে চৰকাৰে স্কুল-কলেজসমূহ বন্ধ কৰাৰ নিৰ্দেশ দিছে।
ৱাশ্বিংটন ডিচিকে ধৰি দেশখনৰ কমেও ৩৭খন প্ৰদেশত এই সিদ্ধান্ত বলৱৎ কৰা হৈছে। আমেৰিকাই কৰ’নাৰ সংক্ৰমণ নিয়ন্ত্ৰণত আনিবলৈ এই সিদ্ধান্ত গ্ৰহণ কৰিছে।
বাতৰি অনুসৰি, আমেৰিকা যুক্তৰাষ্ট্ৰৰ অধিকাংশ গৱৰ্ণৰে এই নিৰ্দেশ দিছে যে কৰ’না ভাইৰাছৰ সংক্ৰমণ ৰোধ কৰাত স্কুল বন্ধ কৰাটো সুফলদায়ক হ’ব। এই ৩৭খন প্ৰদেশত এই নিয়ম প্ৰযোজ্য কৰিবলৈ পৰামৰ্শ দিয়া হৈছিল।
আনহাতে, দেশখনৰ কেইখনমান প্ৰদেশে কৈ আছে যে তেওঁলোকে সামাজিক দূৰত্ব বজাই ৰখাৰ নিয়ম মানি চলি স্কুল খুলিব পাৰে। কিন্তু পৰিস্থিতি যিধৰণে আগবাঢ়িছে তালৈ চাই অনুমান কৰিব পাৰি যে আমেৰিকাত এই শিক্ষাবৰ্ষত হয়তো ছাত্ৰ-ছাত্ৰী স্কুল যাব নোৱাৰিব।
আমেৰিকাৰ যুক্তৰাষ্ট্ৰীয় চৰকাৰেও দেশখনত বিভিন্ন পৰ্যায়ত পুনৰ খোলাৰ বাবে নিৰ্দেশনা জাৰি কৰিছে যদিও স্কুল খোলাৰ ক্ষেত্ৰত নিষেধাজ্ঞা জাৰি থাকিব।
উল্লেখযোগ্য যে ফ্ল’ৰিডা, টেক্সাছ আৰু ৱাশ্বিংটনৰ লগতে ৱাশ্বিংটন ডিচিসহ কেইবাখনো প্ৰদেশে ইয়াৰ বাবে নিৰ্দেশ জাৰি কৰিছে যে যুক্তৰাষ্ট্ৰীয় চৰকাৰৰ এই সিদ্ধান্ত অতি আদৰণীয়।
আমেৰিকাৰ ৩৭খন প্ৰদেশত এই সিদ্ধান্ত কাৰ্যকৰী হ’ব পাৰে আৰু ইয়াৰ ফলত আমেৰিকাৰ ৩কোটি স্কুলীয়া ছাত্ৰ-ছাত্ৰী ক্ষতিগ্ৰস্ত হ’ব।
তদুপৰি, এৰিজোনা, হাৰ্ভাৰ্ড আৰু ব’ষ্টন য়ুনিভাৰ্ছিটিও বন্ধ থাকিব। বহুতো ছাত্ৰ-ছাত্ৰীয়ে চৰকাৰৰ সিদ্ধান্তক আদৰণি জনাইছে।
ইপিনে, কেলিফ’ৰ্ণিয়া, ইডাহো, ছাউথ ডকোটা আৰু টেনেছিয়ে ছাত্ৰ-ছাত্ৰীক দূৰ সংযোগ শিক্ষা ব্যৱস্থাৰ জৰিয়তে শিক্ষা প্ৰদান কৰিব। বৰ্তমানৰ দৰে তেওঁলোকে অনলাইন মাধ্যমকে শিক্ষা প্ৰদান আৰ্হি হিচাপে গ্ৰহণ কৰিব।
এতিয়া ভাৰততো এনেকুৱা কিবা সিদ্ধান্ত লোৱা হ’ব পাৰে নেকি? সেইয়া অৱশ্যে এই মুহূৰ্তত কোৱাটো কিছু আগতীয়া হ’ব।