চীনৰ লেবৰটৰীৰ পৰা কৰ’না বিয়পাৰ ডাঙৰ প্ৰমান হাতত পৰিছে আমেৰিকাৰ; বিদেশ মন্ত্ৰীৰ দাবী

আমেৰিকাৰ বিদেশ মন্ত্ৰী মাইক পোম্পিয়’ই কৈছে যে কৰ’না ভাইৰাছৰ সংক্ৰমণ চীনৰ লেবৰটৰীৰ পৰা বিয়পাৰ ডাঙৰ প্ৰমান আছে। অৱশ্যে বিদেশ মন্ত্ৰী গৰাকীয়ে সংবাদ মাধ্যমৰ আগত কোনো প্ৰমান দাঙি ধৰা নাই।

বিশ্বৰ বহুকেইখন দেশে বহুদিনৰ পৰাই উহানত থকা চীনৰ লেবৰ এপৰত সন্দেহ ব্যক্ত কৰি আহিছে। লেবটোত কৰ’না ভাইৰাছৰ ওপৰত গৱেষণা কৰা হৈছিল।

ইপিনে, এই সন্দৰ্ভত চীনে সকলো অভিযোগ নাকচ কৰি আহিছে।

এবিচি নিউজৰ সৈতে হোৱা এক সাক্ষাৎকাৰত দেওবাৰে আমেৰিকাৰ বিদেশ মন্ত্ৰী মাইক পোম্পিয়’ই চীনৰ ওপৰত গুৰুতৰ অভিযোগ আনে আৰু প্ৰমান থকাৰ কথাও ব্যক্ত কৰে।

পূৰ্বে মাইকে কৈছিল যে আমেৰিকাই চীনৰ উহান চহৰৰ লেবৰ পৰা কৰ’না ভাইৰাছ বিয়পিছে নে তাৰ অনুসন্ধান চলাই আছে।

আমেৰিকাৰ বিদেশ মন্ত্ৰী গৰাকীয়ে কয় যে এয়া ক’ৰ পৰা বিয়পিছে তাৰ বহুত ডাঙৰ প্ৰমান মজুত আছে।‘মই আপোনালোকক ক’ব পাৰো যে উহানৰ লেবৰ পৰা ই বিয়পি পৰা সম্পৰ্কত ডাঙৰ প্ৰমান মজুত আছে।‘

সাক্ষাৎকাৰটোত কিছু বিব্ৰত হৈ পৰা বিদেশ মন্ত্ৰীগৰাকী কয়,’’চাওক, এতিয়ালৈকে আটাইতকৈ যোগ্য বিশেষজ্ঞৰ মত হৈছে যে এই ভাইৰাছ তৈয়াৰ কৰা হৈছে। এই মুহূৰ্তত এই মত মানি নোলোৱাৰ পক্ষে মোৰ হাতত কোনো যুক্তি নাই।‘’

যোৱা বৃহস্পতিবাৰে আমেৰিকাৰ ৰাষ্ট্ৰপতি ডোনাল্ড ট্ৰাম্পেও একেধৰণে দাবী কৰি কৈছিল যে তেওঁ চীনৰ লেবৰ পৰা ভাইৰাছটো বিয়পা সম্পৰ্কত প্ৰমান দেখিছে যদিও সেয়া সদৰী কৰিব নোৱাৰে।

আনহাতে, বৃহস্পতিবাৰেই ট্ৰাম্পৰ বিপৰীত ভাষ্য প্ৰদান কৰি মাইক পোম্পিয়’ই এক সাক্ষাৎকাৰত কৈছিল যে এয়া উহান ইনষ্টিটিউট অফ ভাইৰ’লজিৰ পৰা অহা বুলি নাজানো আৰু এইটোও নাজানো যে এইটো ৱেট মাৰ্কেট পৰা বিয়পিছে নে আন কোনো স্থানৰ পৰা বিয়পিছে। আমাৰ হাতত ইয়াৰ কোনো উত্তৰ নাই।