অন্তিম পৰ্যায়ত উত্তৰকাশীৰ উদ্ধাৰ অভিযান: সুৰঙ্গত আৱদ্ধ ৪১ শ্ৰমিকে অতি সোনকালে দেখিব পোহৰ
অন্তিম পৰ্যায়ত উপনীত হৈছে উত্তৰাখণ্ডৰ উত্তৰকাশীত সুৰঙ্গত আৱদ্ধ ৪১ জন শ্ৰমিকৰ উদ্ধাৰৰ বাবে চলি থকা উদ্ধাৰ অভিযান।
যোৱা ১২ নৱেম্বৰৰ পৰা সুৰঙ্গত আৱদ্ধ হৈ থকা ৪১ জন শ্ৰমিকৰ কাষ চাপিছে উদ্ধাৰকাৰীসকল।
উদ্ধাৰ অভিযান চূড়ান্ত পৰ্যায়ত উপনীত হোৱাৰ প্ৰতি লক্ষ্য ৰাখি সম্প্ৰতি সুৰংগটোৰ বাহিৰত সমবেত হৈছে এম্বুলেন্স।
উদ্ধাৰৰ কাম ক্ষিপ্ৰতাৰে সমাপন কৰাত সহায় কৰিবলৈ দিল্লীৰ পৰা সাতজনীয়া বিশেষজ্ঞৰ দলো ঘটনাস্থলীত উপস্থিত হৈছে।
বুধবাৰে নিশা এজন জ্যেষ্ঠ বিষয়াই বৃহস্পতিবাৰে পুৱাৰ ভিতৰতে উদ্ধাৰকাৰীয়ে শ্ৰমিককেইগৰাকীৰ কাষ চাপিব বুলি সম্ভাৱনা ব্যক্ত কৰিছিল।
ড্ৰিলিঙৰ জৰিয়তে ৪৪ মিটাৰ পাইপ ভিতৰলৈ সুমুৱাই দিয়া হৈছে বুলি বিষয়াগৰাকীয়ে উল্লেখ কৰিছিল।
এই পাইপ শ্ৰমিকসকলৰ ওচৰ পালেই ৰাষ্ট্ৰীয় দুৰ্যোগ সঁহাৰি বাহিনী (NDRF)ৰ এজন চিকিৎসকে শ্ৰমিকসকলৰ স্বাস্থ্য পৰীক্ষা কৰিব।
এন ডি আৰ এফৰ তীক্ষ্ণ তত্বাৱধানত পাইপৰ মাজেৰে সুৰংগটোৰ পৰা বাহিৰলৈ ওলাব শ্ৰমিকসকল।
সুৰংগটোৰ বাহিৰত ইতিমধ্যে ৪১খন এম্বুলেন্স মোতায়েন কৰা হৈছে।
শ্ৰমিকসকলক উদ্ধাৰৰ পিছতে চিনিয়ালিছৌৰত স্থাপন কৰা অস্থায়ী চিকিৎসালয়লৈ লৈ যোৱা হ’ব আৰু শ্ৰমিকসকলে চিকিৎসা পৰীক্ষাৰ ভালদৰে সম্পন্ন কৰা হ’ব।