বিশিষ্ট কণ্ঠশিল্পী অৰ্চনা মহন্তৰ দেহাৱসান
ৰাজ্যৰ বিশিষ্ট তথা প্ৰবীণ কণ্ঠশিল্পী অৰ্চনা মহন্ত আৰু নাই।
আজি মহানগৰীৰ হেলথ চিটি হাস্পতালত শেষ নিশ্বাস ত্যাগ কৰে সুকণ্ঠী গায়িকা অৰ্চনা মহন্তই।
যোৱা ১৪ জুলাইৰ পৰা চিকিৎসালয়খনত চিকিৎসাধীন হৈ আছিল শিল্পীগৰাকী।
জানিব পৰা মতে, মগজুৰ ৰক্তক্ষৰণৰ বাবে কিছু দিন পূৰ্বে চিকিৎসালয়ত ভৰ্তি কৰোৱা হৈছিল মহন্তক।
বিহু সম্ৰাটৰূপে খ্যাত প্ৰয়াত খগেন মহন্তৰ পত্নী তথা বলিউদৰ জনপ্ৰিয় কণ্ঠশিল্পী অংগৰাগ পাপন মহন্তৰ মাতৃ অৰ্চনা মহন্তৰ মৃত্যুত গভীৰ শোক প্ৰকাশ কৰিছে ৰাজ্যৰ মুখ্য মন্ত্ৰী সৰ্বানন্দ সোণোৱালে।
ইয়াৰ উপৰি ৰাজ্যিক বিজেপিৰ সভাপতি ৰঞ্জিৎ দাসেও শিল্পীগৰাকীৰ মৃত্যুত শোক প্ৰকাশ কৰাৰ লগতে সোক সন্তপ্ত পৰিয়াললৈ সমবেদনা জ্ঞাপন কৰে।
অ’ ফুলপাহ হালিছ জালিছ আদিৰ দৰে কেইবাটাও জনপ্ৰিয় গীতত কণ্ঠদান কৰা অৰ্চনা মহন্তৰ মৃত্যু সংগীত ক্ষেত্ৰখনৰ বাবে এক অপূৰণীয় ক্ষতি বুলি বিভিন্ন লোকে অভিহিত কৰিছে।