অৱনী বৰঠাকুৰৰ আত্মজীৱনী অভিজ্ঞতাৰ আলোকত এজন কমিউনিষ্ট কৰ্মীৰ স্মৃতিকথা উন্মোচন

আজি অসম ৰাজ্যিক সংগ্ৰাহালয়ৰ প্ৰেক্ষাগৃহত প্ৰবীণ কমিউনিষ্ট নেতা তথা লেখক অৱনী বৰঠাকুৰৰ আত্মজীৱনী “অভিজ্ঞতাৰ আলোকত এজন কমিউনিষ্টকৰ্মীৰ স্মৃতিকথা” উন্মোচন কৰা হয়। গ্ৰন্থখন উন্মোচন কৰে বিশিষ্ট বুদ্ধিজীৱী ড০ হীৰেন গোহাঁয়ে।

গ্ৰন্থখনৰ উন্মোচনৰ প্ৰাকমুহূৰ্তত লেখক ৯০ বছৰীয়া অৱনী বৰঠাকুৰে এজন কমিউনিষ্ট কৰ্মী হিচাপে কৰা জীৱনযোৰা ত্যাগ আৰু ইয়াৰ মাজেদি লাভ কৰা বৈচিত্ৰ্যময় জীৱনস্বাদৰ কিয়দংশ উপস্থিতসকলৰ সৈতে ভগাই লয়। তেওঁ বিশ্বৰ পটভূমিত অসম তথা ভাৰতত সমাজবাদৰ বিভিন্ন উত্থান-পতনৰো চমু আভাসো দাঙি ধৰে।

আনহাতে গ্ৰন্থখনৰ উন্মোচক ড০ হীৰেন গোহাঁয়েও কমিউনিজমে বৰ্তমান সন্মুখীন হোৱা প্ৰত্যাহ্বান আৰু সমালোচনাবোৰৰ বিষয়ত আলোকপাত কৰে।

তাহানিৰ ছ’চিয়েলিষ্ট ছ’ভিয়েট ৰাছিয়াৰ পতন আৰু চীনৰ কিছুমান নীতিয়ে কমিউনিজমক সমালোচনাৰ কাঠগড়াত তোলাত সহায় কৰিছে বুলি  নিজৰ বক্তব্যত ড০ গোহাঁয়ে উল্লেখ কৰে।

আজিৰ গ্ৰন্থ উন্মোচনী সভাখনৰ সভাপতিত্ব কৰা প্ৰাগ নিউজৰ এডিটৰ ইন চীফ জ্যেষ্ঠ সাংবাদিক অজিত কুমাৰ ভূঞায়ো কমিউনিজৰ বিশ্বত কিয় প্ৰয়োজন আৰু প্ৰাসংগিক তাৰ স্পষ্ট ব্যাখ্যা দাঙি ধৰে। তেওঁ নিজে গ্ৰন্থখন পঢ়ি অতি আপ্লুত হোৱা আৰু অতীতৰ নিজৰ ঠাই আমগুৰিৰ কিছু স্মৃতি ইয়াৰ পৃষ্ঠাৰ মাজত বিচাৰি পোৱা বুলি উল্লেখ কৰে।

গ্ৰন্থৰসিক আৰু সাম্যবাদী আদৰ্শত বিশ্বাসসকলক আপ্লুত কৰিব পৰা অৱনী বৰঠাকুৰৰ এই মূল্যৱান আত্মজীৱনীখন আখৰ প্ৰকাশে ছপা কৰি উলিয়াইছে। আগন্তুক গ্ৰন্থমেলাত ইয়াক প্ৰায় সকলো বিপণিতে পাব পাৰে।