দলত সন্মান আৰু স্বীকৃতি নাই! অসম প্ৰদেশ কংগ্ৰেছৰ উপ-সভাপতি ৰাজু সাহুৰ পদত্যাগ পত্ৰ 

বিপদে লগ এৰা নাই কংগ্ৰেছক। ইজনৰ পিছত সিজনকৈ নেতাই পদত্যাগ কৰিছে দলটোৰ পৰা। এইবাৰ ভূপেন বৰালৈ পদত্যাগ পত্ৰ প্ৰেৰণ কৰিছে অসম প্ৰদেশ কংগ্ৰেছৰ উপ-সভাপতি ৰাজু সাহুৱে। 

পত্ৰত সাহুৱে দলৰ সিদ্ধান্ত গ্ৰহণ প্ৰক্ৰিয়াৰ প্ৰতি অসন্তুষ্টি প্ৰকাশ কৰিছে। ডিব্ৰুগড় আৰু তিনিচুকীয়া জিলা সম্পৰ্কীয় বিষয় সন্দৰ্ভত তেওঁৰ মতামতক অৱজ্ঞা কৰাৰো অভিযোগ উত্থাপন কৰিছে সাহুৱে।

ৰাজু সাহুৱে আক্ষেপ প্ৰকাশ কৰে যে দলীয় কাৰ্যকলাপৰ আয়োজন আৰু পৰিচালনাৰ ক্ষেত্ৰত তেওঁ নিষ্ঠা আৰু অক্লান্ত প্ৰচেষ্টা আগবঢ়োৱা সত্ত্বেও তেওঁৰ অধীনস্থ ডিব্ৰুগড় আৰেউ তিনিচুকীয়া জিলাৰ সৈতে জড়িত সিদ্ধান্তসমূহৰ বিষয়ে তেওঁৰ সৈতে কেতিয়াও আলোচনা কৰা হোৱা নাই।

তেওঁ দলীয় কাৰ্য্যৰ প্ৰতি থকা দায়বদ্ধতাক কথা উল্লেখ কৰি কয় যে তেওঁ নিজৰ খৰচতো অদম্যভাৱে কাম কৰি আহিছে, যাতে অঞ্চলটোত দলৰ স্বাৰ্থক আগুৱাই নিব পাৰি।

সাহুৱে তেওঁৰ জ্যেষ্ঠসকলৰ পৰা স্বীকৃতি আৰু সঁহাৰিৰ অভাৱ অনুভৱ কৰা বুলিও পত্ৰত উল্লেখ কৰিছে।

ফলস্বৰূপে ৰাজু সাহুৱে এপিচিচিৰ উপ-সভাপতি পদৰ পৰা পদত্যাগ কৰাৰ সিদ্ধাত গ্ৰহণ কৰিছে বুলি উল্লেখ কৰিছে।

ইয়াৰ উপৰিও দলৰ ভৱিষ্যতৰ নেতা গঢ় দিয়াৰ  ক্ষেত্ৰত দলে পদক্ষেপ গ্ৰহণ নকৰাৰ অভিযোগো উত্থাপন কৰিছে সাহুৱে।