শান্তি কেতিয়া! পুনৰ উত্তপ্ত মণিপুৰঃ সংঘৰ্ষত এজন যুৱক নিহত, চাৰিজন আহত
গোষ্ঠীসংঘৰ্ষত জৰ্জৰিত মণিপুৰ এতিয়াও হোৱা নাই শান্ত। হিংসাজৰ্জৰ পৰিস্থিতিয়ে গ্ৰাস কৰা ৰাজ্যখনত আজি পুনৰ সৃষ্টি হয় সংঘৰ্ষৰ। এই সংঘৰ্ষত প্ৰাণ হেৰুৱাইছে এজন যুৱকে।
প্ৰকাশিত খবৰ অনুসৰি, ৰাজ্যখনৰ ইম্ফল পূৱ আৰু কাংপকপি জিলাৰ সীমান্তৱৰ্তী অঞ্চলত এই সংঘৰ্ষৰ সৃষ্টি হয়। দুটা পক্ষৰ মাজত হোৱা গুলীয়াগুলীত গাঁৱৰ স্থানীয় স্বেচ্ছাসেৱক যুৱকজনৰ মৃত্যু হয়।
এই সংঘৰ্ষত লগতে আন চাৰিজন লোক আহত হোৱা বুলি জানিব পৰা গৈছে। জানিব পৰা মতে সোমবাৰে নিশাৰ পৰা আৰম্ভ হোৱা এই সংঘৰ্ষ আজিও অব্যাহত আছে।
মণিপুৰ আৰক্ষীয়েনিহত যুৱকজনক মণিপুৰৰ ইম্ফল পূৱ জিলাৰ খামেলোক গাঁৱৰ বাসিন্দা লিকমাবাম দামোচা (২৮) বুলি চিনাক্ত কৰিছে।
সংঘৰ্ষৰ সময়ত তেওঁৰ বুকুত গুলী লাগিছিল আৰু থিতাতে মৃত্যু হৈছিল বুলি মণিপুৰ আৰক্ষীয়ে নিশ্চিত কৰিছে।
আনহাতে গাঁৱৰ আন চাৰিজন স্বেচ্ছাসেৱক ক্ৰমে মইৰাংথেম নাওচা (২২), লাইশ্ৰম ইহুলাকপা (২৬), সাগোলছেম লয়া (২৫) আৰু ছিনাম ছেম (২৫) সংঘৰ্ষত আহত হয়।
আহত লোকসকলক তৎক্ষণাত ইম্ফলৰ এখন হাস্পতাললৈ লৈ যোৱা হয় বুলি মণিপুৰ আৰক্ষীয়ে জানিবলৈ দিয়ে। আনহাতে দুজন উগ্ৰপন্থীয়ে প্ৰাণ হেৰুৱাইছে বুলি সন্দেহ কৰা হৈছে।