বিৰাট কোহলীতকৈ পাকিস্তানৰ বাবৰ আজমৰ বেটিং শৈলী বেছি ভাল! কোনে ক’লে?

বিৰাট কোহলীৰ বেটিং শৈলীত খুঁট ধৰা পেলাইছে পাকিস্তানৰ এগৰাকী প্ৰাক্তন ফাষ্ট বলাৰ আকিব জাভেদে।

তেওঁৰ মতে, বিৰাট কোহলীতকৈ পাকিস্তানৰ বেটছমেন বাবৰ আজম বেছি ভাল আৰু বাবৰৰ পৰা বিৰাটে বেটিং শৈলী শিকা উচিত।

জাভেদৰ এই মন্তব্যৰ পাছতে ক্ৰিকেট অনুৰাগীসকলৰ মাজত হৈ চৈৰ সৃষ্টি হৈছে।

‘ক্ৰিকেট পাকিস্তান’ক দিয়া এটা সাক্ষাৎকাৰত জাভেদে কয় যে বাবৰৰ তুলনাত বিৰাটৰ এক বেটিং দুৰ্বলতা আছে, সেয়া হৈছে বল যদি চুইং কৰে, তেনেহ’লে অফ ষ্টাম্পৰ বাহিৰৰ বলে মাজে মাজে বিপদত পেলায় কোহলীক।

তেওঁ কয় যে সেইবাবেই ইংলেণ্ডৰ ফাষ্ট বলাৰ জেমছ এণ্ডাৰছনৰ বলত বিৰাট কোহলী অনেকবাৰ আউট হৈছে।

কিন্তু বাবৰ আজমৰ সেই দুৰ্বলতা নাই, তেওঁ কয়।

আনকি, এই ক্ষেত্ৰত বাবৰক তেওঁ শচীন টেণ্ডুলকাৰৰ স’তেও তুলনা কৰে।

আনহাতে, পাকিস্তানৰ ক্ৰিকেটাৰসকলক বিৰাট কোহলীৰ ফিটনেচ সজাগতাক অনুসৰণ কৰিবলৈ তেওঁ পৰামৰ্শ জনায়।

তেওঁ কয় যে কোহলীৰ ফিটনেচ সজাগতাক যদি বাবৰে অনুসৰণ কৰে, তেন্তে তেওঁ আৰু অধিক ভাল ক্ৰিকেটাৰ হ’ব পাৰিব।

প্ৰাক্তন পাকিস্তানী ক্ৰিকেটাৰজনৰ এই মন্তব্যৰ পাছতে বিৰাট কোহলীৰ অনুৰাগীসকল উন্মাদ- উত্ৰাৱল হৈ পৰা দেখা গৈছে।