কোহলীৰ অবাঞ্ছিত অভিলেখ, অতিক্ৰম কৰিলে ৰাহুল দ্ৰাবিড়ক

এইমুহূৰ্তত কেৰিয়াৰৰ শ্ৰেষ্ঠ ফৰ্মত নাই ভাৰতীয় ক্ৰিকেট দলৰ প্ৰাক্তন অধিনায়ক বিৰাট কোহলী। ইতিমধ্যে বহু বিশেষজ্ঞৰ পৰা সাম্প্ৰতিক ক্ৰিকেটৰ শ্ৰেষ্ঠ খেলুৱৈৰ মৰ্যাদা অৰ্জন কৰা কোহলীৰ শেহতীয়া প্ৰদৰ্শনে নিৰাশ কৰিছে ক্ৰিকেট অনুৰাগীক।

শুকুৰবাৰে পাৰলৰ বোলেণ্ড পাৰ্কত দক্ষিণ আফ্ৰিকাৰ বিৰুদ্ধে দ্বিতীয় খন এদিনীয়াত এক অবাঞ্ছিত ৰেক’ৰ্ড তালিকাত ৰাহুল দ্ৰাবিড়ক অতিক্ৰম কৰে। মেচখনত কোনো ৰান সংগ্ৰহ নকৰাকৈ আউট হয় কোহলী।

কোহলীৰ এদিনীয়া কেৰিয়াৰত এইটো আছিল ১৪ সংখ্যক ডাক। এইদৰে কোহলীয়ে ভাৰতৰ বৰ্তমানৰ মুখ্য প্ৰশিক্ষক দ্ৰাবিড় আৰু বৰ্তমানৰ ভাৰতৰ অধিনায়ক ৰোহিত শৰ্মাক অতিক্ৰম কৰে। দ্ৰাবিড় আৰু ৰোহিতৰ নামত ১৩ টাকৈ এদিনীয়া ডাক আছে।

সুৰেশ ৰাইনা আৰু বীৰেন্দ্ৰ ছেহৱাগৰ সৈতে এদিনীয় ক্ৰিকেটত সৰ্বাধিক ডাক সংগ্ৰহকাৰী ভাৰতীয় খেলুৱৈৰ তালিকাত কোহলী বৰ্তমান যুটীয়াভাৱে চতুৰ্থ স্থানত আছে।

১ ৰ পৰা ৭ নম্বৰৰ ভিতৰত বেটিং কৰা ভাৰতীয় বেটছমেনৰ ক্ষেত্ৰত সৰ্বাধিক ডাক সংগ্ৰহকাৰী তালিকাৰ শীৰ্ষ তিনিটা স্থানত আছে শচীন তেণ্ডুলকাৰ (২০), যুৱৰাজ সিং (১৮) আৰু সৌৰভ গাংগুলী (১৬)।

উল্লেখ্য যে ২০১৯ চনৰ আগষ্টত ৱেষ্ট ইণ্ডিজত কোহলীয়ে অন্তিম বাৰৰ বাবে এদিনীয়াত শতক শতক অৰ্জন কৰিছিল।সেইদৰে ২০১৯ চনৰ নৱেম্বৰত বাংলাদেশৰ বিৰুদ্ধে টেষ্টত নিজৰ অন্তিমটো শতকীয় ইনিংছ খেলিছিল কোহলীয়ে।

এই শতকটোৱেই আছিল আন্তঃৰাষ্ট্ৰীয় ক্ৰিকেটত কোহলীৰ অন্তিমটো শতক। তাৰ পিছৰে পৰা যোৱা দুই বছৰ ধৰি আন্তঃৰাষ্ট্ৰীয় কেৰিয়াৰত দেশৰ হৈ শতকীয় ইনিংছ খেলাত ব্যৰ্থ হৈছে কোহলী।