মহান কোহলিৰ ‘বিৰাট’ মন্তব্য! অভিলেখ স্পৰ্শ কৰি ক’লে, তেওঁৰ দৰে কেতিয়াও হ’ব নোৱাৰো, তেওঁৱেই মোৰ হিৰ’

শচীনৰ এদিনীয়াৰ সৰ্বাধিক শতকৰ বিশ্ব অভিলেখ ভংগ কৰাটো কোহলিৰ বাবে এতিয়া মাথোঁ সময়ৰ অপেক্ষা। এইক্ষেত্ৰত বিৰাটে দেওবাৰে অভিলেখ স্পৰ্শ কৰিছিল মাষ্টাৰ ব্লাষ্টাৰৰ। ক্ৰিকেট বিশেষজ্ঞসকলে দীৰ্ঘদিন ধৰি ভৱিষ্যদ্বাণী কৰি আহিছে যে এদিনীয়া শতকৰ ক্ষেত্ৰত কোহলীয়ে শচীনক অতিক্ৰম কৰিব। শচীনে নিজেই বিচাৰে এই বিশ্ব অভিলেখ কোহলীৰ হাততে হওক।

দেওবাৰে ইডেনত ৪৯ সংখ্যক এদিনীয়া শতক অৰ্জন কৰি বিৰাট কোহলীয়ে শচীন টেণ্ডুলকাৰৰ পৰা বিশেষ বাৰ্তা লাভ কৰে। ছচিয়েল মিডিয়াত শচীনে কোহলীক অভিনন্দন জনাই লিখিছে যে তেওঁৰ ৪৯ৰ পৰা ৫০তম (টেষ্ট) শতকত উপনীত হ’বলৈ ৩৬৫ দিন সময় লাগিছিল। তেওঁ আশা কৰিছে যে অহা কেইদিনমানৰ ভিতৰত অৰ্থাৎ চলিত বিশ্বকাপত কোহলীয়ে নিজৰ অভিলেখ ভংগ কৰি ৫০ সংখ্যক এদিনীয়া শতক অৰ্জন কৰিব।

কোহলীয়ে সদায় শচীনক আদৰ্শ হিচাপে মানি আহিছে। মেচৰ শেষত বিৰাটে নিজৰ অভিলেখ ভংগ কৰাৰ ক্ষেত্ৰত একেবাৰে বিনম্ৰ হৈ পৰিল। ভাৰতীয় সংস্কৃতিৰ প্ৰকৃত বাহক হিচাপে জ্যেষ্ঠ তাৰকাগৰাকীৰ প্ৰতি সন্মানত কোহলীৰ কণ্ঠৰ পৰা নিগৰিল ‘বিৰাট’ মন্তব্য।

শচীনৰ অভিনন্দন বাৰ্তাৰ বিষয়ে অৱগত হোৱাৰ পিছত বিৰাটে কয়, ‘মোৰ নায়কৰ অভিলেখ স্পৰ্শ কৰাটো মোৰ বাবে অতি বিশেষ। মানুহে তুলনা কৰি ভাল পায়। কিন্তু সঁচা কথাটো হ’ল মই কেতিয়াও তেওঁৰ দৰে হ’ব নোৱাৰিম। আমি সকলোৱে  নিখুঁত বেটিঙৰ বাবে তেওঁৰ কথাকে পাতো।’

পিছত বিৰাটে আৰু কয়, ‘মই মোৰ সাধ্য অনুসৰি শ্ৰেষ্ঠখিনি দিবলৈ চেষ্টা কৰো। দেশৰ বাবে জয় কঢ়িয়াই আনিবলৈ চেষ্টা কৰো। যিয়েই নহওক শচীন সদায় মোৰ নায়ক হৈ থাকিব। মোৰ বাবে ই এক অতি আৱেগিক মুহূৰ্ত। মই ক’ৰ পৰা আহিছো মই জানো। টিভিত তেওঁৰ খেল চাই ডাঙৰ হোৱা সেই দিনবোৰৰ কথা মনত আছে। গতিকে, আজি এই ঠাইত থিয় হৈ তেওঁৰ পৰা প্ৰশংসা পোৱাটো মোৰ বাবে এক ডাঙৰ কথা।‘

Well played Virat.
It took me 365 days to go from 49 to 50 earlier this year. I hope you go from 49 to 50 and break my record in the next few days.
Congratulations!!#INDvSA pic.twitter.com/PVe4iXfGFk

— Sachin Tendulkar (@sachin_rt) November 5, 2023

উল্লেখ্য যে দেওবাৰে ইডেনত ৫টা বাউণ্ডেৰীৰ সহায়ত বিৰাট কোহলীয়ে ৬৭টা বলত নিজৰ ব্যক্তিগত অৰ্দ্ধশতক সম্পূৰ্ণ কৰে। তেওঁ ১১৯টা বলত ১০টা বাউণ্ডেৰীৰে শতকৰ সীমা অতিক্ৰম কৰে। শেষত বিৰাটে ১২১টা বলত ১০১ ৰান সংগ্ৰহ কৰি অপৰাজিত হৈ থাকে।

4⃣9⃣ 𝙊𝘿𝙄 𝘾𝙀𝙉𝙏𝙐𝙍𝙄𝙀𝙎!

Sachin Tendulkar 🤝 Virat Kohli

Congratulations to Virat Kohli as he equals the legendary Sachin Tendulkar's record for the most ODI 💯s! 👏#TeamIndia | #CWC23 | #MenInBlue | #INDvSA pic.twitter.com/lXu9qJakOz

— BCCI (@BCCI) November 5, 2023

ভাৰতে প্ৰথমে বেটিং কৰি নিৰ্ধাৰিত ৫০ অভাৰত ৫ উইকেটত ৩২৬ ৰানৰ বিশাল স্কোৰ কৰে। দক্ষিণ আফ্ৰিকাই ২৭.১ অভাৰত মাত্ৰ ৮৩ ৰান সংগ্ৰহ কৰি অল আউট হয়। খেলখনত ভাৰতে ২৪৩ ৰানৰ বৃহৎ ব্যৱধানত জয়লাভ কৰে।