বৰগীতৰ সাধক বিশিষ্ট সংগীত শিল্পী বিবেকানন্দ শৰ্মাৰ মৃত্যু, বঙাইগাঁৱত শোকৰ ছাঁ
নামনি অসমৰ প্ৰখ্যাত চহৰ বঙাইগাঁও নিৱাসী সংগীতৰ প্ৰাক্তন বিশিষ্ট শিক্ষক বিবেকানন্দ শৰ্মা (৬৪)ই শেষ নিশ্বাস ত্যাগ কৰাৰ খবৰ পাই তেখেতৰ গুণমুগ্ধ সকলৰ মাজত গভীৰ শোকৰ ছাঁ পৰিছে।
বিবেকানন্দ শৰ্মা বঙাইগাঁৱৰ স্বাগত হস্পিটালত চিকিৎসাধীন হৈ থকা অৱস্থাতে মৃত্যুক সাৱটি লয়। তেওঁৰ মৃত্যুত স্বাগত হস্পিটালৰ বহু কেইগৰাকী বিশিষ্ট চিকিৎসক আৰু অন্যান্য কৰ্মীসকলে গভীৰ শোক প্ৰকাশ কৰাৰ লগতে শ্ৰদ্ধাঞ্জলি অৰ্পনেৰে আত্মাৰ সদগতি কামনা কৰে।
বিবেকানন্দ শৰ্মা সংগীতৰ শিক্ষক পদৰ পৰা অৱসৰ গ্ৰহণ কৰাৰ কিছুদিন পিছত বঙাইগাঁওৰ স্বাগত হস্পিটালতো কৰ্মৰত আছিল । বিবেকানন্দ শৰ্মা এগৰাকী সংগীতৰ সাধক আছিল ।
বিভিন্ন বাদ্যযন্ত্ৰ নিপুণতাৰে বজাইছিল । ওৰেটো জীৱন সংগীত চৰ্চাতে ব্যস্ত থাকি তেখেত সন্তুষ্টি লাভ কৰা দেখা গৈছিল ।
হাঁহি মুখীয়া তথা সহজ সৰল জীৱন যাপন কৰা শৰ্মা বৰগীতৰ এগৰাকী সাধক আছিল।
বিবেকানন্দ শৰ্মাৰ মৃত্যুৰ স্বাগত হস্পিটালৰ পৰিচালন সঞ্চালক তথা সাহিত্যিক ডাঃ এছ কে দাস , ডাঃ ফিৰোজ আহমেদ, ডাঃ এছ বিশ্বাস , ডাঃ অতনু বসুমতাৰী , ডাঃ মৃণালিনী ৰাভা , ডাঃ অঞ্জুমা জেছমিন , ধুবুৰী জিলা সাহিত্য সভাৰ মুখপাত্ৰ তিলক চন্দ্ৰ প্ৰসাদ, বিশিষ্ট সাংবাদিক বিজয় কুমাৰ শৰ্মা , অনিল প্ৰসাদ , পংকজ দত্ত , বিনয় ঝা , সতীশ প্ৰসাদৰ লগতে স্বাগত হস্পিটালৰ নাৰ্ছ , বিষযা , বিভিন্ন বৰ্গৰ কৰ্মচাৰী তথা গুণমুগ্ধ সকলে গভীৰ শোক প্ৰকাশ কৰিছে ।
বিবেকানন্দ শৰ্মাই মৃত্যুৰ সময়ত পত্নী , দুগৰাকী কন্যাক এৰি থৈ গৈছে। নিউ বঙাইগাঁওৰ ৰেলৱে জংচনৰ পৰা কিছু আঁতৰত থকা শ্মশান ঘাটত শৰ্মাৰ অন্তেষ্টিক্ৰিয়া সম্পন্ন কৰা হয়।