অসমৰ বাঙালীসকলক কিমান ভাল পায় শিলাদিত্যই? ধলাৰ পৰিয়ালকেইটাক মাত এষাৰ দিবলৈও নগ’ল

সততে অসমৰ বাঙালীসকলৰ হকে উগ্ৰ সমৰ্থন প্ৰকাশ কৰি অহা বিজেপিৰ বিধায়ক শিলাদিত্যৰ প্ৰকৃততে কিমান আন্তৰিকতা আছে অসমৰ বাঙালী লোকসকলৰ প্ৰতি?

এই প্ৰশ্ন উত্থাপিত হৈছে এই বাবেই যে অচিনাক্ত বন্দুকধাৰীৰ হাতত তিনিচুকীয়াৰ ধলাত পাঁচজনকৈ বাঙালী লোকে প্ৰাণ হেৰুওৱাৰ পিছতো বিধায়কজনে এবাৰলৈ ভুক্তভোগী পৰিয়ালকেইটাৰ ঘৰলৈ এপাক মাৰিবলৈ সময় নাপালে।

আনটো গুৰুত্বপূৰ্ণ কথা হ’ল- এই হত্যাকাণ্ডৰ আঁৰত বিধায়কজনে নিজেই ধাৰাবাহিকভাৱে উচটনিমূলক মন্তব্য দি সৃষ্টি কৰা বাঙালী-বিদ্বেষৰ পৰিৱেশটোও দায়ী।

ইপিনে পৰিৱেশৰ অৱনতি ঘটাৰ পিছত নিজৰ নিৰাপত্তা বঢ়াই ল’লে বিধায়কজনে।

সাম্প্ৰদায়িক উত্তেজক পৰিৱেশ সৃষ্টিৰে সাধাৰণ মানুহৰ জীৱনক এক প্ৰকাৰৰ নিৰাপত্তাহীনতাৰ মাজলৈ ঠেলি দি নিজে নিৰাপত্তা বঢ়াই লোৱাটো আৰু ভুক্তভোগীসকলৰ প্ৰতি অন্ধতা প্ৰদৰ্শন কৰাটো এক প্ৰকাৰৰ প্ৰৱঞ্চনা নহয় নে?

তাৰ পৰিৱৰ্তে অসমৰ বিভিন্ন দল-সংগঠনে ভুক্তভোগী পৰিয়ালকেইটাৰ ঘৰলৈ গৈ সান্ত্বনা দিয়াৰ লগতে তেওঁলোকৰ সকাম-নিকামৰ খা-খৰচৰ দায়িত্বও লয়।

শিলাদিত্যৰ এই দুমুখীয়া স্থিতিক লৈ নৰ্থ ইষ্ট নাওৰ আগত প্ৰতিক্ৰিয়া প্ৰকাশ কৰিছে বাঙালী য়ুনাইটেড ফ’ৰাম অব আছামৰ কৰ্ণধাৰ কমিটীৰ সদস্য তথা সাৰা আসাম বেংগলী ঐক্য মঞ্চৰ সাধাৰণ সম্পাদক শান্তনু মুখাৰ্জীয়ে।

শান্তনু মুখাৰ্জীয়ে আক্ষেপ কৰি কয় যে শিলাদিত্য বাদেই, মুখ্য মন্ত্ৰী সোণোৱালেই উপস্থিত নহ’ল ধলাৰ ৫জন মৃতকৰ পৰিয়ালৰ কাষত।

“শিলাদিত্য দেব বাদ কথা, খোদ মুখ্য মন্ত্ৰী তাত উপস্থিত নোহোৱাটো আটাইতকৈ দুখৰ তথা লাজৰ কথা।” মুখাৰ্জীয়ে কয়।

“মুখ্য মন্ত্ৰী নিজে ঘটনাস্থলীত উপস্থিত নহৈ দুজনমান মন্ত্ৰীক পঠিয়াই নিজৰ দায় সাৰিলে।” এইদৰে অভিযোগ কৰে মুখাৰ্জীয়ে।

ঘটনা সংঘটিত হোৱাৰ পাছদিনা, অৰ্থ্যাৎ ২ নৱেম্বৰৰ দিনা মুখ্য মন্ত্ৰী সৰ্বানন্দ সোণোৱাল ব্যস্ত থাকিল শ্ৰীমন্ত শংকৰদেব কলাক্ষেত্ৰৰ আন্তঃৰাষ্ট্ৰীয় প্ৰেক্ষাগৃহত অনুষ্ঠিত ‘ঘৰে ঘৰে পুখুৰী ঘৰে ঘৰে মাছ’ আঁচনিৰ উদ্বোধনী কাৰ্য্যসূচীত। ইয়াতকৈ দুৰ্ভাগ্যৰ কি কথা হ’ব পাৰে? দুখ প্ৰকাশ কৰি মুখাৰ্জীয়ে কয়।