বেচৰকাৰী সংস্থাৰ দ্বাৰা বশিষ্ঠ মন্দিৰক প্লাষ্টিকমুক্ত কৰাৰ অভিযান

‘ভইচ অব এনভাইৰনমেণ্ট’ নামৰ গুৱাহাটীৰ বেচৰকাৰী সংস্থাটোৱে ঐতিহাসিক বশিষ্ঠ মন্দিৰত এটা স্বচ্ছতা অভিযান আৰম্ভ কৰিছে। প্লাষ্টিকমুক্ত কৰি চাৰিওফালৰ বাতাৱৰণক বসবাসৰ বাবে উপোযগী কৰি তোলাৰ বাবে দেওবাৰে সংস্থাটোৱে  এই ছাফাই অভিযান চলায়।

‘ভইচ অব এনভাইৰনমেণ্টে’ ধৰ্মীয় পৰ্যটনক উদগনি দিয়াৰ উদ্দেশ্যে এই অভিযানটো আৰম্ভ কৰিছে।

প্লাষ্টিকপমুক্ত পৰিৱেশৰ প্ৰয়োজনীয়তা সম্পৰ্কত সমাজকৰ্মী হেমজিৎ দেওধাই ফুকনে কৈছে ‘‘ধৰ্মীয় স্থানৰ সৈতে ধৰ্মীয় পৰ্যটনৰ প্ৰত্যক্ষ সম্পৰ্ক আছে। বৰ্তমান গোলকীয় উষ্ণতা বৃদ্ধি হৈ অহাৰ পৰিপ্ৰেক্ষিতত ধৰ্মীয় স্থানসমূহক প্লাষ্টিকমুক্ত কৰি সকলো ধৰ্মীয় স্থানক আটোম-টোকাৰি পৰ্যটন স্থান হিচাপে গঢ়ি তোলাৰ প্ৰয়োজন আহি পৰিছে।’’

বেচৰকাৰী সংস্থাটোৰ কৰ্মকৰ্তাসকলে তেওঁলোকৰ এই অভিযানত সক্ৰিয় ভূমিকা লোৱাৰ বাবে ৰাইজলৈ আহ্বান জনাইছে।

মন্দিৰৰ চৌপাশ প্লাষ্টিকমুক্ত কৰি ৰাখিবলৈ বেচৰকাৰী সংস্থাটোৱে বশিষ্ঠ মন্দিৰ কৰ্তৃপক্ষৰ সৈতে চলিত বৰ্ষৰ ২৭ মে’ত এখন বুজাবুজিৰ চুক্তিত স্বাক্ষৰ কৰিছে।

এই অভিযানটোৰ মূলমন্ত্ৰ হৈছে ‘নিকা, পৰিৱেশ-বন্ধু আৰু প্লাষ্টিকমুক্ত বশিষ্ঠ মন্দিৰ।’

বেচৰকাৰী সংস্থাটোৱে মন্দিৰৰ চৌহদত বসবাস কৰি অহা স্থানীয় লোকসকলৰ মাজত সচেতনতা সৃষ্টি কৰাৰ বাবে এখন মকলি আলোচনাচক্ৰৰ আয়োজন কৰিছে।

এই অবিযানত বশিষ্ঠ এলেকাৰ বহু সংখ্যক ছাত্ৰ-ছাত্ৰীয়ে অংগ্ৰহণ কৰে।

‘ৰেইজ আৱাৰ ভইচ ফ’ৰ বেটাৰ মাডাৰ আৰ্থ’ মূলমন্ত্ৰেৰে ‘ভইচ অব এনভাইৰনমেণ্ট’ নাৰ সবেচৰকাৰী সংস্থাটোৱে সকলো নাগৰিক সন্থা (স্থানীয় সম্প্ৰদায়, বেচৰকাৰী সংস্থা, শিক্ষানুষ্ঠান, ব্যক্তিগত উদ্যোগ) আৰু চৰকাৰী বিভাগসমূহৰ সৈতে একেলগে বহনক্ষম বিকাশৰ বাবে কাম কৰে।