লাডাখৰ ভাৰত-চীন সংঘাত সন্দৰ্ভত বিৰোধীক কি ক’লে প্ৰতিৰক্ষা মন্ত্ৰী ৰাজনাথ সিঙে?

আজি কিছুদিনৰ পৰা কংগ্ৰেছ নেতা ৰাহুল গান্ধীয়ে টুইটাৰত প্ৰধান মন্ত্ৰী, গৃহমন্ত্ৰী আৰু প্ৰতিৰক্ষা মন্ত্ৰীক বাৰে বাৰে প্ৰশ্ন কৰি আহিছে যে, ‘চীনে কি ভাৰতৰ ভূখণ্ড দখল কৰিছে?’

আনকি এই বিষয়ত চৰকাৰৰ মৌনতাক ৰাহুল গান্ধীয়ে কটাক্ষ কৰিও আহিছে।

চৰকাৰৰ এই মৌনতাক ভ্ৰূক্ষেপ নকৰি কংগ্ৰেছ দল তথা ৰাহুল গান্ধীয়ে লাডাখৰ প্ৰসঙ্গকলৈ চৰকাৰক বাৰম্বাৰ আক্ৰমণ কৰি আহিছে।

কিন্তু তথাপিও এই সংক্ৰান্তত প্ৰধানমন্ত্ৰী নিশ্চূপ হৈ থকাৰ লগতে কেন্দ্ৰীয় প্ৰতিৰক্ষা মন্ত্ৰী আৰু গৃহ মন্ত্ৰীয়েও কোনেও সঠিক উত্তৰ দিয়া নাই।

কিন্তু আজি হঠাতে কেন্দ্ৰীয় প্ৰতিৰক্ষা মন্ত্ৰী ৰজনাথ সিঙে এই সংক্ৰান্তত মুখ খুলিছে।

প্ৰতিৰক্ষা মন্ত্ৰী সিঙে লাডাখত চীনে ভাৰতৰ ভূখণ্ড দখল কৰাৰ সন্দৰ্ভত কয়, ‘আমি কোনো কথাই গোপন কৰি ৰখা নাই।’

কেন্দ্ৰীয় প্ৰতিৰক্ষা মন্ত্ৰীগৰাকীয়ে কোনো পৰিস্থিতিতে জাতীয় স্বাৰ্থৰ সৈতে বুজাবুজি কৰা নহ’ব বুলি আশ্বস্ত কৰিছে দেশবাসীক।

লাডাখৰ চীনা আগ্ৰাসনৰ সম্পৰ্কে কংগ্ৰেছসহ বিৰোধী পক্ষই প্ৰতিদিনে চৰকাৰক কৰি অহা সমালোচনাৰ প্ৰত্যুত্তৰ দি দেওবাৰে জন্মুত প্ৰতিৰক্ষা মন্ত্ৰী ৰাজনাথ সিঙে কয় যে কূটনৈতিক আৰু সেনা পৰ্যায়ত দুই দেশৰ মাজত আলোচনা অব্যাহত আছে।

প্ৰতিৰক্ষা মন্ত্ৰীগৰাকীয়ে চীনেও এই সমস্যাৰ দ্ৰুত সমাধান বিচাৰিছে বুলি কৈ কয় যে, ‘আমি বিৰোধীক আশ্বস্ত কৰিব খুজিছো যে, আমাৰ চৰকাৰে কোনো কথাকেই অন্ধকাৰত নাৰাখে।’

তেওঁ লগতে ঘোষণা কৰে, ‘আমি নিশ্চিত কৰিছো যে, জাতীয় স্বাৰ্থৰ লগত কোনো ক্ষেত্ৰতেই আপোচ কৰা নহ’ব।’