ক’ৰ’না ভাইৰাছৰ সংক্ৰমণে গুৰুতৰ ৰূপ ধাৰণ কৰা ভাৰতৰ ১১ খন জিলা কি কি?

কেন্দ্ৰ চৰকাৰে দেশৰ চাৰিখন ৰাজ্যৰ মুঠ ১১ খন জিলাত ক’ৰ’না ভাইৰাছৰ সংক্ৰমণ ভয়াবহ ৰূপত হৈছে বুলি উল্লেখ কৰে।

কেন্দ্ৰ চৰকাৰে দেশৰ এই চাৰিখন ৰাজ্যৰ ১১ জিলাত ক’ৰ’না ভাইৰাছৰ সংক্ৰমণ ভয়াবহ হাৰে বৃদ্ধি পোৱা বুলি উল্লেখ কৰাৰ লগতে ৰাজ্য চৰকাৰ সমূহলৈ ইয়াক নিয়ন্ত্ৰণৰ বাবে কঠোৰ পদক্ষেপ গ্ৰহণৰ বাবে কয়।

ভাৰতত ক’ৰ’না ভাইৰাছৰ সংক্ৰমণে ভয়াবহ ৰূপ ধাৰণ কৰা জিলা ১১ হৈছে ক্ৰমে- ৰাজস্থানৰ জয়পুৰ, মধ্যপ্ৰদেশৰ ইণ্ডোৰ, মহাৰাষ্ট্ৰৰ মুম্বাই আৰু পুণে আৰু পশ্চিম বংগৰ ক’লকাতা, হাওৰা, উত্তৰ ২৪ পৰগানা, পূব মেদিনীপুৰ, জলপাইগুৰি, দাৰ্জিলিং আৰু কলিমপোং।

আনহাতে, কেন্দ্ৰ চৰকাৰৰ ছয়জনীয়া মন্ত্ৰীৰ এখন কমিতিয়ে এইকেইখন জিলাৰ বৰ্তমানৰ পৰিস্থিতি পৰ্যবেক্ষণ কৰিব বুলিও চৰকাৰৰ তৰফৰ পৰা জানিবলৈ দিয়ে।

ভাৰতত ক’ৰ’না ভাইৰাছত আক্ৰান্ত হোৱা ৰোগীৰ সংখ্যাই ১৭,০০০ অতিক্ৰম কৰিছে।

উল্লেখযোগ্য যে, পশ্চিমবংগৰ বহুকেইখন জিলাত ক’ৰ’নাৰ সংক্ৰমণে গুৰুতৰ ৰূপ ধাৰণ কৰাটো প্ৰতিবেশী ৰাজ্য হিচাপে অসমৰ বাবে অশুভ হিচাপে বিবেচিত হৈছে কাৰণ অসমৰ অধিকাংশ বাণিজ্যিক সম্পৰ্ক পশ্চিমবংগৰ সৈতে দীৰ্ঘদিনৰ পৰা চলি আছে।