কোন দীপ সিদ্ধু? যাৰ ওপৰত দিল্লীৰ হিংসাত্মক ঘটনাক প্ৰৰোচিত কৰাৰ অভিযোগ
গণতন্ত্ৰ দিৱসৰ দিনটোতে ভাৰতীয় ইতিহাসত পূৰ্বে কেতিয়াও নোহোৱা নোপোজা এটা ঘটনা সংঘটিত হ’ল। দেশৰ ৰাজধানী দিল্লীত হোৱা হিংসাত্মক ঘটনাত এতিয়া লজ্জিত হৈ পৰিছে দেশবাসী।
কৃষি আইন বাতিলৰ দাবীত কৃষক সংগঠনে গণৰাজ্য দিৱসৰ দিনটোত উলিওৱা ট্ৰেক্টৰ ৰেলীত কেইবাটাও হিংসাত্মক ঘটনা সংঘটিত হয়।
প্ৰতিবাদী কৃষক সকলে আৰক্ষীৰ বেৰিকেড ভাঙি দিল্লীত প্ৰৱেশ কৰাৰ লগতে ঐতিহাসিক লালকিল্লাত প্ৰৱেশ কৰে আৰু তাত তেওঁলোকৰ পতাকা উত্তোলন কৰে।
এই ঘটনাই দেশজুৰি তীব্ৰ প্ৰতিক্ৰিয়াৰ সৃষ্টি কৰাৰ পিছত কৃষক সংগঠনৰ নেতাসমূহে এই ঘটনাৰ বাবে দীপ সিদ্ধু নামৰ এজন পাঞ্জাৱী অভিনেতাক জগৰীয়া কৰে।
দিল্লীৰ লালকিল্লাত নিচান চাহিবৰ পতাকা উৰুওৱাক কেন্দ্ৰ কৰি সৃষ্টি হোৱা বিতৰ্কৰ পিছ মুহূৰ্তৰ পৰাই পলাতক অৱস্থাত আছে দীপ সিদ্ধু।
ৰাষ্ট্ৰীয় অনুসন্ধানকাৰী সংস্থাই দীপ সিদ্ধুক চমন জাৰি কৰিছে।
অৱশ্যে ফেইচবুকযোগে দীপ সিদ্ধুৱে এটা প’ষ্ট কৰি কয়, ‘আমি প্ৰদৰ্শনৰ সময়ত সম্পূৰ্ণ লোকতান্ত্ৰিক অধিকাৰৰ অধীনত নিচান চাহিবৰ পতাকা লালকিল্লাত উত্তোলন কৰিছো কিন্তু ভাৰতীয় পতাকা আঁতৰোৱা নাছিলো’।
এই ঘটনাক কেন্দ্ৰ কৰি কৃষক সংগঠনৰ নেতাসকলেও প্ৰতিক্ৰিয়া প্ৰকাশ কৰিছে। সমাজকৰ্মী যোগেন্দ্ৰ যাদৱে কয় যে দীপ সিদ্ধু, গেংষ্টাৰৰ পৰা নেতা হোৱা লখা সিধানাই ২৫ জানুৱাৰিৰ নিশা সিংঘু সীমান্তত কৃষকসকলক উচটোৱাৰ চেষ্টা চলাইছিল।
এই সমগ্ৰ ঘটনাৰ তদন্তৰ দাবী উত্থাপন কৰিছে যোগেন্দ্ৰ যাদৱে।
কোন এই দীপ সিদ্ধু
দীপ সিদ্ধুৰ জন্ম হৈছিল ১৯৮৪ চনত পঞ্জাৱৰ মুক্তছৰ জিলাত। উচ্চ শিক্ষিত সিদ্ধুৱে আইনৰ শিক্ষাও গ্ৰহণ কৰিছিল।
কিংফিছাৰ মডেল হণ্ট এৱাৰ্ড জয়ী হোৱাৰ পূৰ্বে কিছুদিনৰ বাবে বাৰ এছ’চিয়েশ্যনৰ সদস্যও আছিল সিদ্ধু।
২০১৫ চনত অভিনয় জগতত খোজ দিয়া সিদ্ধুৰ প্ৰথমখন পঞ্জাৱী ছবি হৈছে ৰমতা জোগী।
উল্লেখ্য যে ২০১৯ চনৰ লোকসভা নিৰ্বাচনৰ সময়ত যেতিয়া অভিনেতা চানী ডেউলে গুৰদাছপুৰ সমষ্টিৰ পৰা নিৰ্বাচন খেলিছিল তেতিয়া তেওঁ দীপ সিদ্ধুক নিৰ্বাচন প্ৰচাৰ সমিতিত স্থান দিছিল।
অৱশ্যে লালকিল্লাত সংঘটিত ঘটনাত দীপ সিদ্ধুৰ নাম জৰিত হোৱাত অভিনেতা তথা সাংসদ চানী ডেউলে এটা টুইট কৰি কয়, ‘দীপ সিদ্ধুৰ সৈতে মোৰ বা মোৰ পৰিয়ালৰ কোনো সম্পৰ্ক নাই’।