ছাত্ৰৰ প্ৰতিবাদত কিয় লাঠীচাৰ্জ, কন্দুৱা গেছ? মোদীৰ বাসভৱনৰ সন্মুখত ৰাহুলৰ ধৰ্ণা, হঠাতে উপস্থিত কেন্দ্ৰীয় মন্ত্ৰী

দিল্লীত ছাত্ৰ আৰু যুৱকসকলৰ সমদলত আৰক্ষীয়ে চলোৱা লাঠীচাৰ্জ আৰু কন্দুৱা গেছ নিক্ষেপৰ প্ৰতিবাদত প্ৰধানমন্ত্ৰী নৰেন্দ্ৰ মোদীৰ বাসভৱনৰ সমীপত ধৰ্ণাত বহে লোকসভাৰ বিৰোধী দলপতি ৰাহুল গান্ধী আৰু কংগ্ৰেছ সভাপতি মল্লিকাৰ্জুন খাৰ্গে। মঙলবাৰে লোককল্যাণ মাৰ্গত অনুষ্ঠিত এই প্ৰতিবাদী কাৰ্যসূচীত ৰাহুলৰ ভগ্নী তথা কংগ্ৰেছ নেত্ৰী প্ৰিয়ংকা গান্ধী, এআইচিচিৰ সাধাৰণ সম্পাদক কে চি বেণুগোপালকে ধৰি আন আন কংগ্ৰেছ সাংসদসকলেও অংশগ্ৰহণ কৰে।

ৰাহুল গান্ধী, মল্লিকাৰ্জুন খাৰ্গে আৰু প্ৰিয়ংকা গান্ধীকে ধৰি কংগ্ৰেছ নেতাসকলে প্ৰধানমন্ত্ৰীৰ লোককল্যাণ মাৰ্গৰ বাসভৱনৰ সমীপত ধৰ্ণা আৰম্ভ কৰাৰ পাছতেই কেন্দ্ৰীয় মন্ত্ৰী জীতেন্দ্ৰ সিঙে গৈ তেওঁলোকক সাক্ষাৎ কৰে। তেওঁ এই কটকটীয়া নিৰাপত্তাবেষ্টনী থকা এলেকাটোৰ পৰা ধৰ্ণা প্ৰত্যাহাৰ কৰিবলৈ অনুৰোধ জনায়। ইয়াৰ বিপৰীতে ৰাহুল গান্ধী আৰু কংগ্ৰেছ নেতাসকলে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ লগতে কেন্দ্ৰীয় গৃহমন্ত্ৰী অমিত শ্বাহ আৰু প্ৰধানমন্ত্ৰী নৰেন্দ্ৰ মোদীৰ পদত্যাগ দাবী কৰে।

উল্লেখযোগ্য যে, চিকিৎসা বিজ্ঞানৰ প্ৰৱেশ পৰীক্ষা নিটৰ প্ৰশ্নকাকত ফাদিল হোৱাৰ প্ৰতিবাদত ককৰোচ জনতা পাৰ্টি চমুকৈ চিজেপিৰ আহ্বানত সোমবাৰে সংসদ ভৱনলৈ উলিওৱা সমদলক কেন্দ্ৰ কৰি দিল্লীত উত্তপ্ত পৰিস্থিতিৰ সৃষ্টি হৈছিল। আৰক্ষীৰ লাঠী আৰু কন্দুৱা গেছৰ বাধা নেওচি সোমবাৰে দুপৰীয়া প্ৰতিবাদকাৰীসকল সংসদ ভৱনৰ ওচৰ পাইছিলগৈ। নিৰাপত্তাৰ খাতিৰত সংসদৰ মূল গেট বন্ধ কৰি দিয়া হৈছিল। সোমবাৰৰ পৰাই সংসদৰ বৰ্ষাকালীন অধিৱেশন আৰম্ভ হৈছে আৰু তাত প্ৰধানমন্ত্ৰীকে ধৰি বিভিন্ন দলৰ সাংসদ তথা কেন্দ্ৰীয় মন্ত্ৰীসকল উপস্থিত আছিল।

চিজেপিৰ নেতৃত্বই অভিযোগ কৰা অনুসৰি, তেওঁলোকৰ শান্তিপূৰ্ণ আন্দোলনত আৰক্ষীয়ে দমনমূলক আচৰণ কৰিছে। এমাহ পূৰ্বে কেন্দ্ৰীয় শিক্ষামন্ত্ৰীৰ পদত্যাগৰ দাবীত চিজেপিয়ে যন্তৰ মন্তৰত আৰম্ভ কৰা আন্দোলনক প্ৰথমে নৰেন্দ্ৰ মোদী আৰু অমিত শ্বাহে গুৰুত্ব দিয়া নাছিল। কিন্তু ধৰ্ণাস্থলীত সোনোম ৱাংচুকৰ যোগদান, ক্ৰমাগত অনশন আৰু জনসাধাৰণৰ ব্যাপক সমৰ্থন দেখি অৱশেষত কেন্দ্ৰীয় মন্ত্ৰী জে পি নড্ডাক সমাধান সূত্ৰ বিচাৰিবলৈ দায়িত্ব দিয়া হয়। প্ৰতিবাদৰ অন্ত পেলাবলৈ তেওঁ চিজেপি নেতাসকলৰ সৈতে এলানি বৈঠকত মিলিত হয় আৰু শিক্ষামন্ত্ৰীৰ পদত্যাগৰ দাবীকে ধৰি তেওঁলোকৰ অন্যান্য দাবীসমূহ পৰীক্ষা কৰি চোৱাৰ আশ্বাস প্ৰদান কৰে।