ম’ম’ৰ লোভত জিভাৰ পানী পৰে নেকি? পিছে সাৱধান! লোভেই পাপ….

ম’ম’- খাদ্যৰসিকৰ খাদ্য সম্ভাৰৰ অন্যতম এক প্ৰিয় উপকৰণ। দিনটোৰ অৱসাদ দূৰৰ লক্ষ্যৰে সান্ধ্য ভ্ৰমণৰ অচিলাৰে পথৰ কাষত কিম্বা ৰেষ্টুৰেণ্টত ম’ম’ৰ সোৱাদ লোৱাৰ এক অনন্য নিচাই। তাতে যদি বতৰ কিছু ঠাণ্ডা হয় অথবা কিনকিনিয়া বৰষুণ, তেতিয়া ক’বই নালাগে!

পিছে সোৱাদৰ প্ৰেমত পৰি অথবা জিভাৰ লোভত পৰি আপুনি সদায় ম’ম’ৰ স্বাদ লয় নেকি? তেতিয়াহ’লে কিন্তু সাৱধান! কথাতে কয় নহয়, লোভেই পাপ; ম’ম’ৰ ক্ষেত্ৰতো তেনেই। দেখাত বা ভবাত ম’ম’ স্বাস্থ্যকৰ যেন লাগিলেও কিন্তু ই হ’ব পাৰে বিপজ্জনক।

ফাষ্ট ফুডৰ দোকান কিম্বা ৰেষ্টুৰেণ্টত আপোনাক পৰিৱেশন কৰা ম’ম’ আটাৰ পৰা তৈয়াৰী নহয়; ম’ম’ তৈয়াৰ কৰা হয় ময়দাৰ পৰা। ময়দা প্ৰতিদিনে খোৱাটো একেবাৰেই উচিত নহয়।

কিয়নো ময়দাত গ্লুক’জৰ পৰিমাণ অতি বেছি। সেইবাবেই চুগাৰত আক্ৰান্ত লোকসকলক মিঠাজাতীয় খাদ্য, আলু ইত্যাদিৰ লগতে ময়দা খোৱাতো বাৰণ কৰা হয়।

প্ৰতিদিনে ময়দাযুক্ত আহাৰ গ্ৰহণ কেৱল চুগাৰ বৃদ্ধিৰে লক্ষণ নহয়, তাৰ লগতে বাঢ়িব পাৰে ওজনো আৰু কোষ্ঠকাঠিন্যৰ সমস্যাও। সেয়েহে জিভাৰ লোভ সম্বৰণ কৰি হ’লেও প্ৰতিদিনে ম’ম’ খোৱাৰ পৰা বিৰত থাকিব লাগে।

ম’ম’ৰ লগত পৰিবেশন কৰা চূপ বহুতৰে প্ৰিয়। এই চূপ সদায় যে ভাল পানীৰে তৈয়াৰ কৰা হয়, তাৰ কোনো নিশ্চয়তা নাথাকে। আৰু সেয়ে এই চূপ খোৱাৰ পিছতো পেট বিষ হোৱাৰ সম্ভাৱনা থাকে।

আপোনাৰ সমুখত প্লেটত মনোমোহাকৈ সজ্জিত ম’ম’ যে সদায় সতেজ, তাৰো নিশ্চয়তা নাই। বহুতে সাধাৰণতে ফ্ৰীজত ৰখা ম’ম’ও পিছদিনা ব্যৱহাৰ কৰে। এনে অসতেজ আৰু অস্বাস্থ্যকৰ ম’ম’ই আপোনাক কেনে বিপদলৈ ঠেলিব পাৰে, কি ঠিক!

গতিকে সোৱাদৰ লোভত প্ৰতিদিনে ম’ম’ খোৱাৰ আগতে দুবাৰ ভাবি চাওক। স্বাস্থ্য অমূল্য ধন, স্বাস্থ্যৰ যতন লওক।