শিক্ষকক অম্বুবাচী মেলাৰ দৰে অনাশৈক্ষিক কামৰ দায়িত্ব কিয়! প্ৰশ্ন ডি ৱাই এফ আইৰ
অম্বুবাচী মেলাৰ বাবে পৰীক্ষা নাপাতিবলৈ গুৱাহাটীৰ স্কুলসমূহক নিৰ্দেশ দিয়াৰ পাছত এইবাৰ ৩১ খন বিদ্যালয়ৰ শিক্ষকক অম্বুবাচী মেলাৰ কামত ব্যৱহাৰ কৰিবলৈ অসম চৰকাৰৰ নিৰ্দেশত শিক্ষা বিভাগে জাননী জাৰি কৰিছে।
শিক্ষকক অনাশৈক্ষিক কামত ব্যৱহাৰ কৰিবলৈ ওলোৱা এই কাৰ্যক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে তীব্ৰ বিৰোধিতা কৰিছে আৰু এই সিদ্ধান্ত পৰিহাৰ কৰিবলৈ আহ্বান জনাইছে।
এক বিবৃতিত ডি ৱাই এফ আই- এ কয়, “অহা ২২ জুনৰ পৰা ২৬ জুনলৈ অম্বুবাচী মেলা অনুষ্ঠিত হ’ব। এই মেলা উপলক্ষে চৰকাৰৰ নিৰ্দেশত ২১ জুনৰ পৰা ২৭ জুনৰ ভিতৰত বিদ্যালয়ৰ কোনো পৰীক্ষা অনুষ্ঠিত নকৰিবলৈ কামৰূপ (মহানগৰ) স্কুল পৰিদৰ্শকে নিৰ্দেশ জাৰি কৰিছিল।”
“ইমানতে ক্ষান্ত নাথাকি কালি পুনৰ ৩১ খন বিদ্যালয়লৈ নিৰ্দেশ জাৰি কৰিছে য’ত কোৱা হৈছে প্ৰতিখন উচ্চতৰ মাধ্যমিক বিদ্যালয়ৰ পৰা ৫ জন আৰু উচ্চ মাধ্যমিক বিদ্যালয়ৰ পৰা ৩ জনকৈ শিক্ষকে অম্বুবাচী মেলাৰ দায়িত্ব পালন কৰিব লাগিব।”— চৰকাৰী নিৰ্দেশনাৰ উদ্ধৃতিৰে সংগঠনটোৱে কয়।
ছাত্ৰ-ছাত্ৰীৰ পৰীক্ষা আৰু ক্লাছ বন্ধ কৰি কোনো দায়িত্বশীল চৰকাৰে অনাশৈক্ষিক কামত শিক্ষকক ব্যৱহাৰ নকৰে বুলি লগতে উল্লেখ কৰে ডি ৱাই এফ আই- এ।
কিন্তু “কথাই প্ৰতি দায়িত্বশীল শাসকৰ পৰিচয় দিব বিচৰা ড° হিমন্ত বিশ্ব শৰ্মা নেতৃত্বাধীন চৰকাৰে স্কুলীয়া ছাত্ৰ-ছাত্ৰীক শিক্ষা গ্ৰহণৰ পৰা বঞ্চিত কৰি চৰম দায়িত্বহীনতাৰ পৰিচয় দিব ওলাইছে” বুলি উল্লেখ কৰি সংগঠনটোৱে এই কাৰ্যক অতি নিন্দনীয় আখ্যা দিয়ে।
চৰকাৰক এনে কাৰ্যৰ পৰা আঁতৰি থাকিবলৈ ডি ৱাই এফ আইয়ে আহ্বান জনাইছে আৰু লগতে চৰকাৰৰ ‘যি মন যায় তাকেই কৰিব’- এনে মনোবৃত্তিৰ বিৰুদ্ধে প্ৰতিবাদ কৰিবলৈ ডি ৱাই এফ আইয়ে শিক্ষক সমাজ তথা সচেতন ৰাইজৰ প্ৰতি আহ্বান জনাইছে।