চামগুৰি-পুৰণিগুদামত বনৰীয়া হাতীৰ উপদ্ৰৱ; এজন লোক আহত

ৰাজ্যত এতিয়া দিনক দিনে বৃদ্ধি পাবলৈ ধৰিছে হাতী-মানুহৰ সংঘাত। ৰাজ্যৰ বিভিন্ন অঞ্চলৰ লগতে চামগুৰি আৰু পুৰণিগুদামৰ বিভিন্ন অঞ্চলতো বনৰীয়া হাতীৰ উপদ্ৰৱে নিদ্ৰা হৰণ কৰিছে সাধাৰণ ৰাইজৰ। এনে সময়তে মঙলবাৰে পুৰণিগুদামৰ ব্ৰহ্মচাৰী আৰু বৰঙাতলিত বনৰীয়া হাতীয়ে চলালে তীব্ৰ উপদ্ৰৱ।

পুৰণিগুদামৰ ব্ৰহ্মচাৰী গাঁৱত এটা বনৰীয়া হাতীয়ে নিশাৰ ভাগত প্ৰৱেশ কৰি এঘৰ লোকৰ ভড়াল ঘৰৰ লগতে এখন ব্যৱসায় প্ৰতিষ্ঠান ভাঙি লণ্ড-ভণ্ড কৰে। হাতীটোৱে এতিয়াও ব্ৰহ্মচাৰীৰ সমীপৰে এখন ঘন জংঘলত অৱস্থান লৈ থকা বুলি স্থানীয় ৰাইজে জানিবলৈ দিয়ে।

ইফালে লাওখোৱা বন্যপ্ৰাণী অভয়াৰণ্যৰ পৰা ওলাই অহা বুলি সন্দেহ কৰা বনৰীয়া হাতীটোৱে বৰঙাতলিৰ হেমাৰবড়িৰ ভদ্ৰেশ্বৰ কাকতি নামৰ এজন লোকক নিশা ঘৰৰ পৰা বাহিৰলৈ অহাৰ সময়ত আক্ৰমণ কৰি গুৰুতৰভাৱে আহত কৰে।

লোকজনক লগে লগে স্থানীয় ৰাইজৰ সহযোগত নগাঁৱৰ অসামৰিক চিকিৎসালয়ত ভৰ্তি কৰোৱা হয় বুলি জানিব পৰা গৈছে।

উল্লেখ্য যে চামগুৰি আৰু পুৰণিগুদামত সম্প্ৰতি বৃদ্ধি পোৱা বনৰীয়া হাতীৰ উপদ্ৰৱ ৰোধৰ বাবে নগাঁও জিলা বন বিভাগক উপযুক্ত ব্যৱস্থা গ্ৰহণৰ বাবে আহ্বান জনাইছে ভুক্তভোগী লোকসকলে।