হাতী-মানুহৰ সংঘাত : ৰংজুলিত ২৪ ঘণ্টাৰ ভিতৰত বিদ্যুতস্পৃষ্ট হৈ দ্বিতীয়টো বনৰীয়া হাতীৰ কৰুণ মৃত্যু
মানুহৰ নৃশংসতাৰ বলী হৈ গোৱালপাৰা জিলাৰ ৰংজুলি বনাঞ্চলত ২৪ ঘণ্টাৰ ভিতৰত দ্বিতীয়টো বনৰীয়া হাতীৰ মৃত্যু হয়।
মঙলবাৰে কন্যাকুছী বনাঞ্চলৰ সমীপৰ খেৰোপাৰা গাঁৱৰ ধাননি পথাৰত বিদ্যুতৰ তাঁৰত বিদ্যুতস্পৃষ্ট হৈ এটা হাতীৰ মৃত্যু হোৱাৰ পাছত বুধবাৰে দ্বিতীয়টো হাতী বিদ্যুতস্পৃষ্ট হৈ মৃত্যুক সাৱতিব লগা হোৱা ঘটনাই অঞ্চলটোত চাঞ্চল্যৰ সৃষ্টি কৰিছে।
বন বিভাগে জানিবলৈ দিয়া মতে, মঙলবাৰে মৃত্যু হোৱা হাতীটোৰ সৈতে আজি মৃত্যু হোৱা হাতীটো একেলগে বিদ্যুতৰ তাঁৰত লাগি গুৰুতৰভাৱে আঘাতপ্ৰাপ্ত হৈছিল।
আঘাতপ্ৰাপ্ত হাতীটোৱে দেহৰ যন্ত্ৰণাত আৰু প্ৰাণৰ ভয়ত বনাঞ্চলৰ ভিতৰলৈ সোমাই যায় আৰু অৱশেষত বনৰ ভিতৰতে তীব্ৰ মৃত্যু যন্ত্ৰনাত চটফটাই কৰুণ মৃত্যুক সাবতি লয়।
উল্লেখযোগ্য যে, বনবিভাগে আহত হাতীটোক চিকিৎসা প্ৰদানৰ বাবে চিকিৎসকক খবৰ দিয়ে যদিও ঘটনাস্থলীত চিকিৎসক উপস্থিত হোৱাৰ পূৰ্বে হাতীটোৰ কৰুণ মৃত্যু হয়।
সমগ্ৰ ঘটনা সম্পৰ্কত ৰংজুলি আৰক্ষী থানাত এখন এজাহাৰ দাখিল কৰা হৈছে বুলি বন বিভাগে প্ৰকাশ কৰে।
বিগত সময়ত ৰংজুলি অঞ্চলত হাতী-মানুহৰ সংঘাতে তীব্ৰ ৰূপ ধাৰণ কৰিছে।
হাতী-মানুহৰ সংঘাতময় সয়মত হাতীৰ আক্ৰমণত মানুহৰ মৃত্যু হোৱাৰ সমান্তৰালভাৱে মানুহেও বিভিন্ন প্ৰকাৰে হাতীক লক্ষ্য কৰি লোৱা পৰিলক্ষিত হৈছে।