কোভিডৰ সঁচাকৈয়ে অন্ত পৰিবনে! কি ক’লে বিশ্ব স্বাস্থ্য সংস্থাই?

২০২২ চনৰ মাৰ্চ মাহৰ ভিতৰতে বিশ্বত কোভিড পৰিস্থিতিৰ অৱসান ঘটিব বুলি বহুতে কৈ আহিছে যদিও দৰাচলতে কোভিডৰ অন্ত পৰিবনে?

বিশ্ব স্বাস্থ্য সংস্থাই পিছে কোভিডৰ অৱসান ঘটাৰ কোনো সময়সীমা উল্লেখ কৰাটো টান বুলিহে মন্তব্য কৰিছে।

বিশ্ব স্বাস্থ্য সংস্থাৰ মুৰব্বী টেড্ৰছ আধানম ঘেব্ৰেয়েছাছে প্ৰকাশ কৰা মতে কোভডিৰ বিৰুদ্ধে বিশ্ববাসীয়ে খেলি থকা খেল খনৰ অন্ত পৰিবলৈ এতিয়াও বহু বাকী আছে।

তেওঁ কয় যে কোভিডৰ সংহাৰ কমক চাৰি বাঢ়িছেহে।সমগ্ৰ বিশ্বত এতিয়া প্ৰতি তিনি ছেকেণ্ডত ১০০ জনকৈ লোক কোভিডত আক্ৰান্ত হৈ আহিছে।

বিশ্ব স্বাস্থ্য সংস্থাৰ ১৫০ সংখ্যক অধিৱেশনত টেড্ৰছ আধানম ঘেব্ৰেয়েছাছে কয় যে কোভিডৰ খেল খন এতিয়াও শেষ হোৱা নাই আৰু ই কিমান দীঘলীয়া হ’ব সেয়াও অনুমান কৰিব নোৱাৰি।

তেওঁ কয় —’ প্ৰায় ৯ সপ্তাহ পূৰ্বে কোভিডৰ অমিক্ৰন প্ৰজাতি ধৰা পৰাৰ পিছত ৮০ নিযুতৰো অধিৰ লোক এই অমিক্ৰনত আক্ৰান্ত হৈছিল’।

বিশ্বৰ বহু অঞ্চলত এতিয়া কোভিডৰ প্ৰজাতি অমিক্ৰনে নতুন নতুন ৰূপত বিকশিত হৈ ত্ৰাসৰ সৃষ্টি কৰিছে।
সেইবাবেই চিন্তিত হৈ পৰিছে বিশ্ব স্বাস্থ্য সংস্থা।

আধানমে কয় যে কোভিডৰ প্ৰথম উৎপত্তিৰ সময়ত চীনৰ বাহিৰত ১০০ জন মান লোকহে আক্ৰান্ত হৈছিল আৰু কোনো লোকৰে মৃত্যু ঘটা নাছিল।

কিন্তু দুটা বছৰৰ ভিতৰতে বিশ্বৰ ৩৫০ নিযুত লোক এই মাৰক ভাইৰাছ বিধত আক্ৰান্ত হ’ল আৰু ৫.৫ নিযুতৰো অধিক লোকৰ মৃত্যু ঘটিল। আধানমে কয় যে বিশ্বত প্ৰতি ১২ ছেকেণ্ডত এজনকৈ লোকে কোভিডত প্ৰাণ হেৰুৱাইছে।