বিধানসভাৰ বিধায়কৰ শপত গ্ৰহণ অনুষ্ঠানত উপস্থিত থাকিব পাৰিবনে অখিল গগৈ?: কি ক’লে অধিবক্তাই?
বিধায়ক হিচাপে নিৰ্বাচিত হোৱাৰ পাছতো অখিল গগৈ এতিয়াও কাৰাৰুদ্ধ হৈ আছে। সাংবিধানিক পদ এটাত অধিষ্ঠিত হোৱাৰ পাছতো এনে কাৰাগাৰৰ জীৱন যাপন কিয় বুলিও সচেতন মহলত প্ৰশ্ন উত্থাপিত হৈছে।
কালি অনুষ্ঠিত হৈ যোৱা শপত গ্ৰহণ অনুষ্ঠানত মুখ্যমন্ত্ৰীৰ লগতে নৱ নিৰ্বাচিত মন্ত্ৰীসকলেও শপত গ্ৰহণ কৰে তথা শেহতীয়াকৈ আজি মন্ত্ৰীৰ দপ্তৰসমূহো ভগাই দিয়া হয়।
কালিৰ শপত গ্ৰহণ অনুষ্ঠানত বিৰোধী পক্ষৰো বিধায়কৰ উপস্থিতি দেখিবলৈ পোৱা গৈছিল। কিন্তু শিৱসাগৰ বিধানসভা সমষ্টিৰ নৱ নিৰ্বাচিত বিধায়ক হৈও এই শপত গ্ৰহণ অনুষ্ঠানত অংশগ্ৰহণ কৰিব নোৱাৰিলে বিধায়ক অখিল গগৈয়ে।
তেওঁৰ পত্নী গীতাশ্ৰী তামুলীৰ প্ৰকাশ কৰা অনুসৰি অখিল গগৈক কাৰাগৰৰ পৰা মুক্ত কৰিবলৈ বহু সময়ৰ প্ৰয়োজন হ’ব।
কিন্তু এতিয়া প্ৰশ্ন হয় যে বিধায়কৰ শপত গ্ৰহণ অনুষ্ঠানত উপস্থিত থাকিব পাৰিবনে অখিল গগৈয়ে?
এই সন্দৰ্ভত আমাৰ সাংবাদিকৰ আগত অখিল গগৈৰ অধিবক্তা কৃষ্ণ গগৈয়ে কয় “আমি এই সন্দৰ্ভত গুৱাহাটীৰ উচ্চ ন্যায়ালয়ত লেখ আবেদন দাখিল কৰিছো আৰু এই বিষয়ত গুৱাহাটীৰ উচ্চ ন্যায়ালয়ে কালিলৈ ৰায় প্ৰদান কৰিব।”
‘অখিল গগৈয়ে যিহেতু সাংবিধানিক পদবী এটা লাভ কৰিছে। গতিকে তেওঁক বিধানসভাত বিধায়কৰ শপত গ্ৰহণ অনুষ্ঠানত উপস্থিত থাকিবৰ বাবে অনুমতি প্ৰদান কৰিব লাগে বুলি উচ্চ ন্যায়ালয়ত লেখ আবেদন দাখিল কৰিছো।‘ কৃষ্ণ গগৈয়ে এইদৰে কয়।