গো আশ্ৰয় শিবিৰলৈ ৰূপান্তৰিত কৰা হ’ব সকলো সুৰা বিপণী! উমা ভাৰতীৰ হুমকি

ৰাজ্যত যিমান সুৰা বিপণী আছে, সেই সকলো সুৰা বিপণীক গো আশ্ৰয় শিবিৰলৈ ৰূপান্তৰিত কৰা হ’ব। মধ্যপ্ৰদেশত এই হুমকি দিছে ৰাজ্যখনৰ প্ৰাক্তন মুখ্যমন্ত্ৰী তথা ভাৰতীয় জনতা পাৰ্টিৰ প্ৰবীণ নেত্ৰী উমা ভাৰতীয়ে।

শনিবাৰে বিয়লি উমা ভাৰতী ৰাজধানী ভূপালৰ অযোধ্যা নগৰ ত্ৰিখণ্ডৰ এখন সুৰাৰ দোকানৰ সমীপত অৱস্থিত এক মন্দিৰত উপস্থিত হৈছিল আৰু চৰকাৰৰ নতুন সুৰা নীতি ঘোষণাৰ বাবে অপেক্ষা কৰি চাৰিদিন তাতেই থাকিব বুলি ঘোষণা কৰিছিল।

কালি এই চাৰিদিনীয়া সীমাৰ অন্ত পেলাই ভাৰতীয়ে ৰাজ্যত নিয়ন্ত্ৰিত সুৰা নীতিৰ দাবীৰ সমৰ্থনত ‘মধুশালা মে গৌশালা’ (সুৰা বিপণীৰ ঠাইত গো আশ্ৰয় শিবিৰ) কাৰ্যসূচী আৰম্ভ কৰাৰ কথা ঘোষণা কৰে।

সংবাদ মাধ্যমক সম্বোধন কৰি বিজেপিৰ প্ৰবীণ নেত্ৰী গৰাকীয়ে দাবী কৰে যে ভূপালৰ পৰা প্ৰায় ৩৫০ কিলোমিটাৰ দূৰত্বত অৱস্থিত নিৱাৰী জিলাৰ অৰ্ছাস্থিত বিখ্যাত ৰাম ৰাজা চৰকাৰ মন্দিৰৰ সমীপত সুৰাৰ দোকান সম্পূৰ্ণ অবৈধ।

চৰকাৰৰ সুৰা নীতিৰ বিলম্বৰ বাবে আৰু অপেক্ষা নকৰাকৈ নিয়ম উলংঘা কৰি চলি থকা সুৰাৰ বিপণীসমূহক গো আশ্ৰয় শিবিৰলৈ ৰূপান্তৰিত কৰিবলৈ আৰম্ভ কৰা হ’ব বুলি হুংকাৰ দিয়ে ভাৰতীয়ে।

বিজেপি নেত্ৰীগৰাকীয়ে অৰ্ছাৰ অবৈধ সুৰা বিপণীৰ বাহিৰত ১১ টা গৰু ৰখাৰ ব্যৱস্থা কৰিবলৈ স্থানীয় ৰাইজক নিৰ্দেশ দিয়ে আৰু কোনে তেওঁৰ এই কাৰ্যত বাধা দিয়াৰ সাহস কৰে দেখা যাব বুলি প্ৰত্যাহ্বান জনায়।

উমা ভাৰতীয়ে কয়, “ভগৱান ৰামৰ নামত চৰকাৰ গঠন কৰা হৈছে যদিও অৰ্ছাৰ ৰাম ৰজা চৰকাৰ মন্দিৰৰ সমীপত এখন সুৰাৰ দোকান স্থাপন কৰিবলৈ দিয়া হৈছে।”

বিজেপি শাসিত মধ্যপ্ৰদেশ মহিলাৰ বিৰুদ্ধে অপৰাধৰ ক্ষেত্ৰত আগবাঢ়ি আছে আৰু সুৰা সেৱন ইয়াৰ অন্যতম কাৰণ বুলি দাবী কৰে প্ৰাক্তন মুখ্যমন্ত্ৰীগৰাকীয়ে। সুৰা সেৱনৰ বিৰুদ্ধে ভাৰতীয়া চলাই অহা অভিযানক লৈ বিজেপিৰ এটা অংশই তেওঁক বিদ্ৰুপ কৰা বুলিও অভিযোগ উত্থাপন কৰে ভাৰতীয়ে।