এটা আঙঠিতে ৭৮০১ টুকুৰা হীৰা! বিশ্বাভিলেখ গঢ়িলে ব্ৰহ্মকমলে

হীৰাৰ প্ৰতি মানুহৰ আকৰ্ষণ অতীজৰে পৰাই আছে।

অতি মূল্যৱান হীৰাৰ আঙঠি এটাৰ গৰাকী হবলৈ কাৰনো মন নাযাব।

সাধাৰণতে একোটা হীৰাৰ আঙঠিত খুব বেছি ৫-১০ টুকুৰা হীৰা খচিত হৈ থাকিব পাৰে।

কিন্তু হায়দৰাবাদৰ এগৰাকী ডিজাইনাৰে প্ৰস্তুত কৰা এটা হীৰাৰ আঙঠিত খচিত হৈছে ৭৮০১ টুকুৰা হীৰা।

এটা আঙঠিতে ইমান বেছি সংখ্যক হীৰা খচিত এইটোৱেই হৈছে বিশ্বৰ একমাত্ৰ আঙঠি।

হায়দৰাবাদৰ ডিজাইনাৰ কোট্টি শ্ৰীকান্তই সাজি উলিওৱা এই আঙঠিটো ব্ৰহ্মকমলৰ আৰ্হিত প্ৰস্তুত কৰা হৈছে।

ব্ৰহ্মকমল হৈছে ভাৰতৰ অতি কম সংখ্যক স্থানত হোৱা এবিধ বিশেষ প্ৰজাতিৰ পদুম ফুল।

২০১৮ চনতে ডিজাইনাৰ কোট্টি শ্ৰীবাস্তৱে সিদ্ধান্ত লৈছিল যে তেওঁ ব্ৰহ্মকমলৰ দৰে এটা হীৰাৰ আঙঠি গঢ়িব।

সেই আঙঠিত খচিত কৰা হব যিমান বেছিকৈ পাৰি সিমান হীৰা। ভৱামতেই কাম।

ব্ৰহ্মকমল গঢ়াত লাগি গ’ল ডিজাইনাৰ গৰাকী। অৱশেষত কঠোৰ পৰিশ্ৰমৰ অন্তত ডিজাইনাৰ কোট্টি শ্ৰীবাস্তৱে সাজি উলিয়ালে বিশ্বৰ আটাইতকৈ বেছি হীৰা খচিত আঙঠিটো।

ইতিমধ্যে গীনিজ বুক অৱ ৱৰ্ল্ড ৰেকৰ্ডছে এই আঙঠিটোৱেই বিশ্বৰ আটাইতকৈ বেছি হীৰা খচিত আঙঠি হিচাবে স্বীকৃতি  দিছে।