ইক্ৰাম হুছেইনৰ মৃত্যুত ভাৰতে এগৰাকী সাহসী জোৱান হেৰুৱালে : অমিত শ্বাহ

বিশ্বজুৰি ত্ৰাসৰ সৃষ্টি কৰা ক’ৰ’না ভাইৰাছৰ ফলত মঙলবাৰে নতুন দিল্লীত কৰ্মৰত অসমৰ ইক্ৰাম হুছেইন নামৰ এগৰাকী চি আৰ পি এফ জোৱানৰ মৃত্যুত গভীৰ শোক প্ৰকাশ কৰিছে কেন্দ্ৰীয় গৃহ মন্ত্ৰী অমিত শ্বাহে।

গৃহ মন্ত্ৰী অমিত শ্বাহে হুছেইনৰ মৃত্যুত ভাৰতে এজন সাহসী সেনা জোৱান হেৰুৱালে বুলি মন্তব্য কৰে।

লগতে পঢ়ক :ক’ৰ’নাৰ সংক্ৰমণত মৃত্যু দিল্লীত কৰ্মৰত সৰুপেটাৰ চি আৰ পি এফৰ জোৱান ইক্ৰাম হুছেইনৰ

‍‘ইক্ৰাম হুছেইন মৃত্যুৰ আগ মুহূৰ্তলৈকে যথেষ্ট সাহসীকতাৰে ক’ভিদ-১৯ৰ বিৰুদ্ধে যুঁজ দি আছিল। সোমবাৰে মোৰ ইক্ৰাম হুছেইনৰ পৰিয়ালৰ সৈতে কথা-বতৰা হৈছিল’, অমিত শ্বাহে এইদৰে কয়।

উল্লেখ্য যে যোৱা ২৩ এপ্ৰিলত ইক্ৰাম হুছেইনৰ দেহত ক’ৰ’নাৰ অৱস্থিতি ধৰা পৰিছিল আৰু ২৪ এপ্ৰিলত দিল্লী ছফৰজং চিকিৎসালয়ত ভৰ্তি কৰা হৈছিল। আৰু ইয়াতে মঙলবাৰে মৃত্যুবৰণ কৰে।

ইক্ৰাম হুছেইনৰ ঘৰ বৰপেটা জিলাৰ সৰুপেটা থানাৰ অন্তৰ্গত বৰবড়িত। তেওঁ চি আৰ পি ফৰ ৩১ নং বেটেলিয়নৰ উপ পৰিদৰ্শক হিচাপে দিল্লীত নিয়োজিত হৈ আছিল।