লিফ্ট দিয়াৰ ছলেৰে এগৰাকী যুৱতীক দলবদ্ধ ধৰ্ষণৰ অভিযোগ; উত্তৰাখণ্ডত ২ জনক গ্ৰেপ্তাৰ

চলন্ত গাড়ীত এগৰাকী যুৱতীক দলবদ্ধ ধৰ্ষণৰ অভিযোগ উঠিছে। উত্তৰাখণ্ডৰ ৰুদ্ৰপুৰ অঞ্চলত সংঘটিত হৈছে এই ঘটনা। যুৱতীগৰাকীক লিফ্ট দিয়াৰ ছলেৰে তুলি নি দলবদ্ধ ধৰ্ষণ কৰাৰ অভিযোগ উত্থাপন হৈছে। আৰক্ষীয়ে জনোৱা মতে, অভিযোগৰ ভিত্তিত ২ জন লোকক গ্ৰেপ্তাৰ কৰা হৈছে।

আৰক্ষীৰ সূত্ৰ অনুসৰি যুৱতীগৰাকী উধম সিং নগৰৰ ৰুদ্ৰপুৰৰ চিডকুল ঔদ্যোগিক এলেকাৰ এটা প্ৰতিষ্ঠানত কৰ্মৰত। অভিযোগ উত্থাপন হৈছে যে লিফ্ট দিয়াৰ অজুহাতত দুজন লোকে তেওঁক গাড়ীত উঠাই নি দলবদ্ধ ধৰ্ষণ কৰে।

যুৱতীগৰাকী ৰুদ্ৰপুৰ অঞ্চলৰ বাসিন্দা। যোৱা সোমবাৰে তেওঁ কামলৈ গৈছিল। তাত ট্ৰেনজিট কেম্প এলেকাত তেওঁ গাড়ীৰ বাবে অপেক্ষা কৰি আছিল। সেই মুহূৰ্তত গাড়ীত দুজন মানুহ আহি তেওঁক লিফ্ট দিয়াৰ প্ৰস্তাৱ দিয়ে। দুয়োজনে যুৱতীগৰাকীক তেওঁৰ কৰ্মস্থলীত নমাই দিব বুলিও কৈছিল। সিহঁতক বিশ্বাস কৰি তেওঁ গাড়ীত উঠিছিল।

আৰক্ষীৰ সূত্ৰৰ মতে, অভিযুক্তই তেওঁক কৰ্মস্থলীলৈ নিয়াৰ পৰিৱৰ্তে আগতীয়াকৈ ঠিক কৰা ঠাইলৈ লৈ যায়। তাতে গাড়ীতে তেওঁক ধৰ্ষণ কৰা বুলি অভিযোগ উত্থাপন কৰিছে যুৱতীগৰাকীয়ে। যৌন নিৰ্যাতন চলোৱাৰ পিছত লোক দুজনে তেওঁক খালী আৰু নিৰ্জন ঠাইত এৰি থৈ যোৱাৰ অভিযোগ উত্থাপন কৰে। তাৰ পৰাই তেওঁ কেনেবাকৈ ট্ৰেনজিট কেম্প থানাত উপস্থিত হৈ আৰক্ষীৰ ওচৰত এজাহাৰ দাখিল কৰে।

ৰুদ্ৰপুৰ চক্ৰ পৰিদৰ্শক প্ৰশান্ত কুমাৰে জানিবলৈ দিয়া মতে, যুৱতীগৰাকীৰ অভিযোগৰ ভিত্তিত দলবদ্ধ ধৰ্ষণৰ গোচৰ ৰুজু কৰি তদন্ত আৰম্ভ কৰা হয়। অভিযুক্তক গ্ৰেপ্তাৰ কৰিবলৈ একাধিক দল গঠন কৰি তালাচী আৰম্ভ কৰা হয়। মঙলবাৰে তালাচী অভিযানত ৰাহুল দাস নামৰ এজন অভিযুক্তক গ্ৰেপ্তাৰ কৰা হয়। আৰক্ষী সূত্ৰ অনুসৰি ৰাহুল উত্তৰ প্ৰদেশৰ পিলভিটৰ গবিয়া চৰাই অঞ্চলৰ বাসিন্দা। তেওঁ ৰুদ্ৰপুৰৰ আদৰ্শ কলনীত বাস কৰে। পিছত আন এজন অভিযুক্তকো গ্ৰেপ্তাৰ কৰা হৈছে বুলি জনায় কুমাৰে।

বৃহস্পতিবাৰে আৰক্ষীয়ে জনোৱা মতে, এই অপৰাধৰ বাবে ব্যৱহাৰ কৰা গাড়ীখনো জব্দ কৰা হৈছে। এখন হোটেলৰ সমীপতে গাড়ীখন এৰি থৈ গৈছিল অভিযুক্তই। গাড়ীখনৰ ফৰেনছিক পৰীক্ষাও কৰা হৈছে। গাড়ীখনত যুৱতীগৰাকীৰ চুলি আৰু আন কিছু বস্তু উদ্ধাৰ হোৱা বুলি বিষয়াসকলে জানিবলৈ দিয়ে।