পুনৰ নিৰ্ভয়া কাণ্ড! চলন্ত বাছত মহিলাক নিচাযুক্ত দ্ৰব্য সেৱন কৰাই গণধৰ্ষণ

পুনৰ দিল্লীৰ নিৰ্ভয়া কাণ্ডৰ দৰে এক গণধৰ্ষণৰ ঘটনা পোহৰলৈ আহিছে। উত্তৰ প্ৰদেশৰ মীৰাটত সংঘটিত হৈছে এই জঘন্য ঘটনা।

অভিযোগ অনুসৰি চলন্ত বাছত এগৰাকী মহিলাক নিচাযুক্ত দ্ৰব্য সেৱন কৰাই ডাইভাৰ আৰু কণ্ডাক্টৰে গোটেই নিশা ধৰ্ষণ কৰে।

ধৰ্ষণ কৰাৰ পাছত অভিযুক্তই মহিলাগৰাকীক দিল্লীমুখী পথৰ মেৱলা ফ্লাই অ’ভাৰৰ ওচৰত পেলাই থৈ যায়।

মহিলাগৰাকীক জিলা হাস্পাতলত ভৰ্তি কৰোৱা হৈছে আৰু আৰক্ষীয়ে ঘটনাটোৰ তদন্ত আৰম্ভ কৰিছে।

ৰাজ্যখনৰ মিৰ্জাপুৰৰ বাসিন্দা মহিলাগৰাকীৰ পাঁচ বছৰ পূৰ্বে মীৰাটৰ চৰধনা অঞ্চলৰ এগৰাকী লোকৰ সৈতে বিয়া হৈছেল।

শুকুৰবাৰে নিশা স্বামীৰ সৈতে কাজিয়া হোৱাৰ পাছত মহিলাগৰাকীয়ে বৈশালী বাছ ষ্টেশ্যনলৈ আহে। তাত প্ৰয়াগৰাজলৈ যাবলৈ কানপুৰ ৰ’ডৱেজ বাছত উঠে।

মহিলাগৰাকীয়ে জানিবলৈ দিয়া মতে বাছখনত তেওঁৱেই একমাত্ৰ যাত্ৰী আছিল। বাছখন চলাৰ পাছতে কণ্ডাক্টৰে তেওঁক ক’ল্ডড্ৰিংক খাবলৈ দিয়ে। ইয়াৰ পাছতে তেওঁ সংজ্ঞাহীন হৈ পৰে।

অভিযোগ অনুসৰি চলন্ত বাছৰ ভিতৰতে ড্ৰাইভাৰ-কণ্ডাক্টৰে মহিলাগৰাকীক বলাৎকাৰ কৰে। শনিবাৰে মহিলাগৰাকীক দিল্লীমুখী পথৰ মেৱলা ফ্লাই অ’ভাৰৰ ওচৰৰ গোশালাৰ বাহিৰত পেলাই থৈ যায়।

শনিবাৰে পুৱা প্ৰায় ৮বজাত আৰক্ষীয়ে খৱৰটো লাভ কৰে আৰু এম্বুলেন্সেৰে মহিলাগৰাকীক নি হাস্পাতলত ভৰ্তি কৰায়।

মহিলাগৰাকীয়ে চিকিৎসকৰ আগত সম্পূৰ্ণ ঘটনা বৰ্ণনা কৰাৰ পাছত আৰক্ষীয়ে আহি তেওঁৰ ভাষ্য গ্ৰহণ কৰে।

মীৰাট আৰক্ষীয়ে ঘটনাটোৰ তদন্ত চলাই আছে আৰু শীঘ্ৰেই অপৰাধীক কৰায়ত্ত কৰিব বুলি সদৰী কৰে।