বোকাখাতৰ অগৰাতলী বনাঞ্চলত বনৰীয়া ম’হৰ আক্ৰমণত নিহত মহিলা

বোকাখাতৰ অগৰাতলী বনাঞ্চলৰ সমীপৱৰ্তী বেলগুৰিত গাঁৱত সংঘটিত হৈছে এক শোকাৱহ ঘটনা। 

কাজিৰঙা ৰাষ্ট্ৰীয় উদ্যানৰ পৰা খাদ্যৰ সন্ধানত ওলাই অহা এটা বনৰীয়া ম’হৰ আক্ৰমণত নিহত হৈছে এগৰাকী মহিলা। নিহত মহিলা গৰাকীৰ নাম দীপা মুণ্ডা (৪৫)।

আজি পুৱা পথাৰত ধান কাটিবলৈ যোৱাৰ সময়তে পথাৰৰ মাজৰ এডোখৰ হাবিত সোমাই থকা এটা বনৰীয়া ম’হে আক্ৰমণ কৰে মহিলা গৰাকীক। ফলত ঘটনাস্থলীতে নিহত হয় মহিলা গৰাকী।

ইয়াৰ পিছত ঘটনাস্থলীত উপস্থিত হয় আৰক্ষী। স্থানীয় ৰাইজৰ অভিযোগ মতে বন বিভাগৰ লোকে বন্য প্ৰাণী নিয়ন্ত্ৰণ আৰু স্থানীয় ৰাইজৰ জীৱন সুৰক্ষা প্ৰদানত ব্যৰ্থ হৈছে। 

ইফালে ৰাষ্ট্ৰীয় উদ্যানখনৰ বহিঃভাগত কোনো কাঁটা তাঁৰৰ ব্যৱস্থা নোহোৱাৰ ফলতে বন্য জন্তুৰ আক্ৰমণৰ এনে ঘটনা সঘনাই সংঘটিত হোৱাৰ অভিযোগ স্থানীয় ৰাইজৰ। 

ঘটনাস্থলীত বহু সময়লৈকে বন বিভাগৰ লোক উপস্থিত নোহোৱা আৰু ঘটনাস্থলীতে  মৃতদেহ পৰি থকাক কেন্দ্ৰ কৰি এক হুলস্থুলীয়া পৰিস্থিতি উদ্ভৱ হয়।

ইফালে অগৰাতলী ৰেঞ্জৰ ৰেঞ্জাৰ বিদ্যুৎ বিকাশ বৰাৰ গ্ৰেপ্তাৰৰ দাবী তুলিছে স্থানীয় ৰাইজে।