জাপানী এনকেফেলাইটিছত বোকাখাতত এগৰাকী মহিলাৰ মৃত্যু

বোকাখাতত জাপানী এনকেফেলাটিছ ৰোগত শুকুৰবাৰে নিশা এগৰাকী মহিলাৰ মৃত্যু হয় ৷ বোকাখাত অসামৰিক চিকিৎসালয়ৰ পৰা উচ্চ চিকিৎসাৰ বাবে যোৰহাটলৈ প্ৰেৰণ কৰা মিনু বৰা যোৱা ১৭ জুলাইৰ পৰা যোৰহাট মেডিকেল কলেজ চিকৎসালয়ত চিকিৎসাধীন হৈ আছিল ৷

জানিব পৰা মতে, যোৰহাট চিকিৎসা মহাবিদ্যালয়ৰ চিকিৎসালয়তে মিনু বৰাৰ এনকেফেলাইটিছ ৰোগত চিকিৎসাধীন অৱস্থাতে মৃত্যু হয় ৷

অসম গণ পৰিষদ দলৰ দক্ষিণ কাজিৰঙা  আঞ্চলিক সমিতিৰ সম্পাদক প্ৰশান্ত বৰাৰ মাতৃ মিনু বৰাৰ মৃত্যুত বহু দল-সংগঠনে শোক প্ৰকাশ কৰিছে ৷

উল্লেখ্য যে  জাপানী এনকেফেলাইটিছত আক্ৰান্ত বোকাখাতৰ আন দুজন ৰোগী বৰ্তমানো যোৰহাট চিকিৎসা মহাবিদ্যালয় চিকিৎসালয়ত চিকিৎসাধীন হৈ আছে ৷

আনহাতে, অসমত এতিয়ালৈ জাপানী এনকেফেলাইটিছত ১২৫ জন ৰোগীৰ মৃত্যু হৈছে আৰু শুকুৰবাৰে ৰাজ্যখনৰ বিভিন্ন জিলাত ছয়জন লোকৰ এই ৰোগত মৃত্যুৰ বাতৰি পোৱা গৈছে।

ইপিনে, জাপানী এনকেফেলাইটিছত মৃত্যু হোৱা লোকৰ বিষয়টো সন্দৰ্ভত স্বাস্থ্য বিষয়াই জানিবলৈ দিয়ে যে বতৰৰ পৰিৱৰ্তনৰ লগে লগে এই ৰোগত আক্ৰান্ত ৰোগীৰ সংখ্যা ক্ৰমে হ্ৰাস পাই আহিছে।