মাইক্ৰফাইনেন্সৰ ঋণ; ‘’মুখ্যমন্ত্ৰীয়ে আমাক কথা দিছিল, আমি তেওঁক সেইকথা সোঁৱৰাই দিছো’’
“আই মাতৃ সকলক মই কথা দিছো, যদি এই কথা মই ৰক্ষা কৰিব নোৱাৰো তেন্তে মোৰ নিজৰ আইক প্ৰতাৰণা কৰা হব”। মুখ্যমন্ত্ৰীক এই কথা সোঁৱৰালে শিৱসাগৰৰ মহিলাই।
মাইক্ৰফাইনেন্সৰ ঋণ ৰেহাইৰ দাবীত ৰাজ্যৰ চৌদিশে অব্যাহত আছে প্ৰতিবাদ। প্ৰতিদিনাই গ্ৰাম্যাঞ্চলৰ মহিলা ওলাই আহিছে মাইক্ৰফাইনেন্সৰ ঋণ ৰেহাইৰ দাবীত প্ৰতিবাদ কৰিবলৈ।
মুখ্যমন্ত্ৰী হিমন্ত বিশ্ব শৰ্মাই নিৰ্বাচনৰ পূৰ্বে দিয়া প্ৰতিশ্ৰুতি পালন নকৰাৰ অভিযোগ ৰাজ্যৰ মহিলাৰ।
মহিলা সকলৰ দাবী, ঋণ মাফৰ ক্ষেত্ৰত চৰ্ত নহয়, ৰাজ্যৰ সকলো মহিলাৰ ঋণ মাফ কৰক মুখ্যমন্ত্ৰীয়ে।
আজি মাইক্ৰফাইনেন্সৰ ঋণ ৰেহাই আৰু ঋণ ৰেহাইৰ ক্ষেত্ৰত চৰকাৰে আৰোপ কৰা চৰ্তৰ বিৰুদ্ধে শ শ মহিলা ওলাই আহে শিৱসাগৰ জিলাৰ বেতবাৰীৰ বালিবাটত। বালিবাটৰ ৰাজপথত এই ভুক্তভোগী মহিলা সকলে তীব্ৰ প্ৰতিবাদ সাব্যস্ত কৰে।
প্ৰতিবাদী মহিলা সকলে কয়, ‘’মুখ্যমন্ত্ৰীয়ে নিৰ্বাচনৰ পূৰ্বে দিয়া প্ৰতিশ্ৰুতি পালন কৰা নাই। নিৰ্বাচনৰ পূৰ্বে শিৱসাগৰৰ হাঁহচৰাৰ নিৰ্বাচনী সভাত ঘোষণা কৰিছিল ৰাজ্যত পুনৰ বিজেপি চৰকাৰ হ’লে সকলো মহিলাৰ ঋণ মাফ কৰা হব। কিন্তু ঋণ ৰেহাইৰ ক্ষেত্ৰত চৰকাৰে যি কেইটা চৰ্ত বান্ধি দিছে সেয়া কোনোপধ্যে মানি লব নোৱাৰি।‘’
ইপিনে মহিলাৰ প্ৰশ্ন চাহাৰা, এপিলেন পৰাগ, সাৰদা আদি কোম্পানীয়ে গ্ৰাম্যাঞ্চলৰ লোকক প্ৰতাৰণা কৰি কোটি কোটি টকা লুটি নিছিল। চৰকাৰে সেই টকা আমাক ঘূৰাই দিয়ক। আমি সেই টকাৰে মাইক্ৰফাইনেন্সৰ ঋণ পৰিশোধ কৰিম বুলি মন্তব্য কৰে।
উল্লেখ্য যে অসমত প্ৰায় ২৬ লাখ মহিলাই মাইক্ৰফাইনেন্সৰ পৰা ঋণ লৈছিল আৰু এই ঋণৰ পৰিমাণ প্ৰায় ১২ হাজাৰ কোটি টকা। নিৰ্বাচনৰ পূৰ্বে মন্ত্ৰী হিমন্ত বিশ্ব শৰ্মাই প্ৰতিখন নিৰ্বাচনী সভাত ঘোষণা কৰিছিল এইবাৰ বিজেপি চৰকাৰ হ’লে অসমৰ মহিলাৰ মাইক্ৰফাইনেন্সৰ ঋণ মাফ কৰা হব। যাৰ বাবে উৎফুল্লিত হৈ পৰিছিল এই মহিলাসকল।
কিন্তু নিৰ্বাচনত জয়ী হোৱাৰ পিছত মখ্যমন্ত্ৰীৰ আসন লাভ কৰা হিমন্ত বিশ্ব শৰ্মাই বিধায়ক অশোক সিংঘলৰ নেতৃত্বত মাইক্ৰফাইনেন্সৰ ঋণ মাফ কৰাৰ সন্দৰ্ভত এখন কমিটি গঠন কৰি দিছিল। এই কমিটিয়ে যি কেইটা চৰ্ত আৰোপ কৰিছিল সেই চৰ্তত মুঠেই সন্তুষ্ট নহয় ৰাজ্যৰ মহিলাসকল। যাৰ বাবে প্ৰতিদিনেই এইদৰে প্ৰতিবাদ সাব্যস্ত কৰিবলৈ বাধ্য হৈছে এইসকল মহিলা।
প্ৰশ্ন হয়, দেশৰ পুঁজিপতিক হাজাৰ হাজাৰ টকাৰ ঋণ মাফ কৰি দিয়া বিজেপি চৰকাৰে খাটিখোৱা এই সকল মহিলাৰ ঋণ মাফ কৰি দিবনে? মুখ্যমন্ত্ৰী হিমন্ত বিশ্ব শৰ্মাই নিৰ্বাচনৰ সময়ত দিয়া প্ৰতিশ্ৰুতি পালন কৰিব নে? নে নিৰ্বাচনৰ সময়ত ভোটাৰক আকৃষ্ট কৰিবলৈ ৰাজনৈতিক নেতাই দিয়া ‘জুমলা’ হিচাপে পৰিগণিত হব মাইক্ৰফাইনেন্সৰ ঋণ ৰেহাইৰ দিয়া প্ৰতিশ্ৰুতি?