মাৰ্ঘেৰিটাত ‘কা’ বাতিলৰ দাবীত আছুৰ উদ্যোগত “নাৰী গৰ্জন”

জাতি ধ্বংসী ‘কা’ৰ বিৰোধিতাৰে আজি তিনিচুকীয়া জিলাৰ মাৰ্ঘেৰিটাতো আছুৰ আহ্বানত হাজাৰ হাজাৰ মহিলাই ‘নাৰী গৰ্জন’ অনুষ্ঠানেৰে প্ৰতিবাদ সাব্যস্ত কৰে।

উত্তৰ মাৰ্ঘেৰিটা ৰংগ মঞ্চত ২৪ টা সংগঠনৰ নাৰী প্ৰতিনিধিৰ লগতে মাৰ্ঘেৰিটা, জাগুন, টিৰাপ আদিৰ বিভিন্ন মহিলা সমিতি আৰু মহিলা সমাজে অংশ গ্ৰহণ কৰে৷

’নাৰী গৰ্জন’ অনুষ্ঠানৰ আৰম্ভণিতে শেহতীয়াকৈ “কা“ আন্দোলনত শ্বহীদ হোৱা ৫ জনকৈ শ্বহীদৰ প্ৰতিচ্ছবিত মাল্যাৰ্পণ, স্মৃতি তৰ্পণ কৰা হয়৷

ইয়াৰ পাছতে আছুৰ মাৰ্ঘেৰিটা আঞ্চলিকৰ সমিতিৰ সভাপতি চিন্তু গগৈ, ভাঃ সম্পাদক ৰুপম বৰুৱা, সমাজকৰ্মী ফুনু চেতিয়া, মাৰ্ঘেৰিটা মহাবিদ্যালয়ৰ অধ্যাপিকা গীতিমনি শইকীয়াকে ধৰি বিভিন্নজনে “কা“ আইনখনে অসমৰ ভাষা-সাহিত্য-সংস্কৃতিৰ প্ৰতি ভাবুকি অনাৰ কথা উল্লেখ কৰি এই আইন বাতিলৰ দাবী জনায়৷

“জয় আই অসম, ’কা’ আমি নামানো, ‘কা’ বাতিল কৰক, বিজেপি চৰকাৰ হুঁচিয়াৰ, কেন্দ্ৰীয় চৰকাৰ হুচিয়াৰ” আদি প্ৰতিবাদী নাৰী সমাজে মাৰ্ঘেৰিটাৰ আকাশ বতাহ মুখৰিত কৰি তোলে৷

আনহাতে লিডু ৰে’লৱে ৰংগমঞ্চতো ‘কা’ বিৰুদ্ধে অৱস্থান ধৰ্মঘটেৰ প্ৰতিবাদী কাৰ্যসূচী অনুষ্ঠিত হয়৷এই প্ৰতিবাদী কাৰ্যসূচীত লিডু কনিষ্ঠ মহাবিদ্যালয়, শংকৰদেৱ বিদ্যাপীঠ উচ্চ মাধ্যমিক বিদ্যালয়, শংকৰদেৱ বিদ্যাপীঠ মধ্য ইংৰাজী বিদ্যালয়কে ধৰি কেইবাখনো বিদ্যালয় আৰু বহুকেইটা দল-সংগঠনে অংশ গ্ৰহণ কৰে।

মাৰ্ঘেৰিটা প’ল ফিল্ডটো মাৰ্ঘেৰিটা চাৰি আলি নাৰী সমাজে প্ৰতিবাদী অৱস্থান ধৰ্মঘট কাৰ্যসূচী ৰূপায়ণ কৰে৷