বিশ্বকাপ বিজয়ী ফ্ৰান্সৰ ডিফেণ্ডাৰ ৰাফেল ভাৰানেৰ ফুটবলৰ পৰা বিদায়

ফ্ৰান্সৰ ডিফেণ্ডাৰ তাৰকা ৰাফেল ভাৰানে আন্তঃৰাষ্ট্ৰীয় কেৰিয়াৰৰ পাছত ক্লাব কেৰিয়াৰৰ পৰা অৱসৰ গ্ৰহণ কৰে।তেওঁ ছচিয়েল মিডিয়াত অৱসৰৰ কথা ঘোষণা কৰে। ৩১ বছৰ বয়সত ভাৰানে নিজৰ ফুটবল কেৰিয়াৰৰ অন্ত পেলায়।

২০২৪ চনত ইটালীৰ ক্লাব কোমোত যোগদান কৰিছিল ফ্ৰান্সৰ ডিফেণ্ডাৰগৰাকীয়ে। কিন্তু সম্ভৱতঃ আঘাতৰ বাবেতেওঁ অৱসৰ ঘোষণা কৰে। নিজৰ ইনষ্টাগ্ৰাম একাউণ্টত ভাৰানে কয় যে “সকলো ভাল কামৰ অন্ত পৰে। মোৰ কেৰিয়াৰত বহু প্ৰত্যাহ্বান গ্ৰহণ কৰিছো। সকলোবোৰ কাৰ্যতঃ অসম্ভৱ যেন লাগিল যদিও পাৰ হৈ গ’ল। মই আটাইতকৈ ভালপোৱা খেলখনক বিদায় দিয়া। মই নিজৰখিনি ধৰি ৰাখিবলৈ সক্ষম হৈছো আৰু এইদৰেই মই যাব বিচাৰো।”

২০১৩ চনত ফ্ৰান্সৰ জাতীয় দলত অভিষেক ঘটিছিল ৰাফেল ভাৰানৰ। ২০২২ চনলৈকে তেওঁ মুঠ ৯৩খন খেল খেলিছে। ২০১৮ চনত বিশ্বকাপ বিজয়ী দলটোৰ সদস্য আছিল ভাৰান। ২০২২ চনত আৰ্জেণ্টিনাৰ বিৰুদ্ধে বিশ্বকাপৰ ফাইনেল খেলখন ৰাষ্ট্ৰীয় দলৰ জাৰ্চি পিন্ধি তেওঁৰ শেষ মেচ আছিল। ২০২৩ চনত আন্তঃৰাষ্ট্ৰীয় ফুটবলৰ পৰা অৱসৰ লোৱাৰ কথা ঘোষণা কৰিছিল ভাৰানে।