আৰণ্যকৰ উদ্যোগত গোলাঘাট জিলাৰ ধলাগুৰিত বিশ্ব হস্তী দিৱস উদযাপন

হাতী মানুহৰ সংঘাতৰ বাবে ৰাজ্যৰ ভিতৰত শীৰ্ষত থকা গোলাঘাট জিলাৰ ধলাগুৰি মধ্য ইংৰাজী বিদ্যালয়ত আজি বিশ্ব হস্তী দিৱস উদযাপন কৰা হয়।

ঈদৰ বন্ধৰ বাবে বিদ্যালয়খনত ১২ আগষ্টৰ পৰিৱৰ্তে ১৩ আগষ্টত হস্তী দিৱসৰ কাৰ্য্যসূচীভাগ অনুষ্ঠিত কৰা হয়।

দেশৰ আগশাৰীৰ প্ৰকৃতি সংগঠন আৰণ্যকৰ উদ্যোগত বিদ্যালয় কৰ্তৃপক্ষ আৰু মৰঙী প্ৰেছ ক্লাবৰ সহযোগত আয়োজিত বিশ্ব হস্তী দিৱসৰ  কাৰ্যসুচীত বিদ্যালয়ৰ ছাত্ৰ ছাত্ৰী, শিক্ষক কৰ্মচাৰীৰ উপৰিও স্থানীয় লোকে অংশ গ্ৰহন কৰে ৷

বিদ্যালয় খনৰ সহকাৰী শিক্ষক জিতেন হাজৰিকাই আঁত ধৰা অনুষ্ঠানত গোলাঘাটৰ ডি এফ অ’ ভাস্কৰ ডেকা , গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়া, মৰঙী প্ৰেছ ক্লাবৰ সভাপতি হেমন্ত শইকীয়া, সম্পাদক প্ৰিয়নদ্বীপ কাকতী, বনাঞ্চলিক বিষয়া পুষ্পধৰ বুঢ়াগোহাঁই , শংকৰ দেৱ শিশু নিকেতনৰ আচাৰ্য নৱজ্যোতি শৰ্মাই অংশগ্ৰহন কৰে।

বিদ্যালয়খনৰ প্ৰধান শিক্ষক অৰূপ দুৱৰাৰ আদৰণী ভাষণৰ পাচত অনুষ্ঠান উদ্বোধন কৰে ৱাইল্ড লাইফ ৱাৰ্ডেন উত্তম শইকীয়াই।

হস্তী দিৱসৰ লগত সংগতি ছাত্ৰ-ছাত্ৰীৰ মাজত ৰচনা আৰু আকস্মিক বক্তৃতা প্ৰতিযোগিতা অনুষ্ঠিত কৰাৰ উপৰিও বিদ্যালয়ৰ দেৱালত হাতীৰ চিত্ৰ অংকন কৰে শিক্ষক নৱজ্যোতি শৰ্মাই।

আনহাতে, অনুষ্ঠানত প্ৰতিযোগিতাত স্থান লাভ কৰা ছাত্ৰ-ছাত্ৰীসকলক আৰণ্যকৰ তৰফৰ পৰা মান পত্ৰ আৰু উপহাৰ প্ৰদান কৰা হয় ৷

অনুষ্ঠানৰ শেষত আৰণ্যকৰ সমন্বয়ক নিৰঞ্জন ভূঞাই হস্তী দিৱসৰ কাৰ্য্যসূচী সফলভাৱে উদযাপন কৰাৰ বাবে সকলোকে আন্তৰিক ধন্যবাদ জ্ঞাপন কৰে  ৷