টেনিছ জগতক আচম্বিতে বিদায় জনালে বিশ্বৰ শীৰ্ষস্থানৰ খেলুৱৈ এশ্লেইগ বাৰ্টিয়ে
সমগ্ৰ ক্ৰীড়া জগতক হতচকিত কৰি টেনিচ ক’ৰ্টক বিদায় জনালে বিশ্ব ৰেংকিঙৰ শীৰ্ষ স্থানৰ মহিলা টেনিছ খেলুৱৈ এশ্লেইগ বাৰ্টিয়ে। মাত্ৰ ২৫ বছৰ বয়সতে টেনিছৰ পৰা অৱসৰ ঘোষণা কৰি বাৰ্টিয়ে একপ্ৰকাৰ চাঞ্চল্যৰ সৃষ্টি কৰিছে।
ইনষ্টাগ্ৰামত পোষ্ট কৰা এটা ভিডিঅ’ বাৰ্তাত বাৰ্টিয়ে কয়, “মই টেনিছৰ পৰা অৱসৰ ঘোষণা কৰাৰ মুহূৰ্তটো মোৰ বাবে কঠিন আৰু মই যথেষ্ট আৱেগিক হৈ পৰিছো।”
“মই বহুত সুখী আৰু ভৱিষ্যতৰ বাবে সাজু। এই মুহূৰ্তত মোৰ বাবে এইয়া সঠিক সিদ্ধান্ত। টেনিছে মোক দিয়া সকলোখিনিৰ বাবে মই কৃতজ্ঞ। ই মোক মোৰ সপোনতকৈও অধিক দিছে।”- বাৰ্টিয়ে কয়।
বাৰ্টিয়ে লগতে কয়, “কিন্তু মই জানো যে এতিয়া মোৰ বাবে আন সপোনবোৰ পূৰণ কৰাৰ সময়। হাতৰ ৰেকেট তললৈ নমাই ৰখাৰ এয়াই সঠিক সময়।”
ৱ’মেন’চ টেনিছ এচ’চিয়েশ্ব্যনে (WTA) নিজৰ অফিচিয়েল টুইটাৰ হেণ্ডেলত বাৰ্টিৰ অৱসৰ ঘোষণাৰ পিছতে এটা বিবৃতি প্ৰকাশ কৰি খেলুৱৈ গৰাকীক টেনিছলৈ আগবঢ়োৱা অৱদানৰ বাবে ধন্যবাদ জনায়।
For every young girl that has looked up to you.
For every one of us that you’ve inspired.
For your love of the game.
Thank you, @ashbarty for the incredible mark you’ve left on-court, off-court and in our hearts 💜 pic.twitter.com/6wp9fmO439
— wta (@WTA) March 23, 2022
উল্লেখ্য যে দুবছৰৰো অধিক সময় ধৰি বাৰ্টি মহিলা ৰেংকিঙত বিশ্বৰ শীৰ্ষ স্থানত অধিষ্ঠিত হৈ আছিল। চমু কেৰিয়াৰত বাৰ্টিয়ে তিনিটা গ্ৰেণ্ড শ্লেম খিতাপ অৰ্জন কৰিছিল।
২০১৯ চনত ফ্ৰেঞ্চ অপেন জয় কৰাৰ পিছত তেওঁ ২০২১ ত উইম্বলডনৰ খিতাপ অৰ্জন কৰিছিল। চলিত বৰ্ষৰ অষ্ট্ৰেলিয়ান অপেন খিতাপ জয়েৰে ৪৪ বছৰৰ পিছত এই খিতাপ জয় কৰা প্ৰথম গৰাকী অষ্ট্ৰেলিয়ান খেলুৱৈ হিচাপে পৰিগণিত হৈছিল বাৰ্টি।
তিনিটা গ্ৰেণ্ড শ্লেম খিতাপৰ লগতে বাৰ্টিয়ে কেৰিয়াৰত ১৫ টা চিংগলছ্ আৰু ১২ টা ডাবলছ্ খিতাপ অৰ্জন কৰিছিল।