ডিমৌৰ বালিকুৰত ‘আৰণ্যক’ৰ উদ্যোগত বিশ্ব আৰ্দ্ৰভূমি দিৱস উদযাপন  

ৰাজ্যৰ আগশাৰীৰ প্ৰকৃতি সংগঠন ‘আৰণ্যক’ৰ উদ্যোগত আজি শিৱসাগৰ জিলাৰ ডিমৌৰ বালিকুৰৰ লুইতপৰীয়া মিচিং ট্ৰাইবেল হাইস্কুলত বিশ্ব আৰ্দ্ৰভূমি দিৱস পালন কৰা হয় ৷

বিদ্যালয়খনৰ প্ৰধান শিক্ষক গনেশ চন্দ্ৰ য়েইনৰ লগতে বিদ্যালয়ৰ সমূহ শিক্ষক-শিক্ষয়ত্ৰী আৰু প্ৰায় শতাধিক ছাত্ৰ-ছাত্ৰীয়ে  অংশ গ্ৰহণ কৰা এই অনুষ্ঠানত ‘আৰণ্যক’ৰ সমন্বয়ক নিৰঞ্জন ভূঞা আৰু গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়াই সমল ব্যক্তি হিচাবে অংশগ্ৰহণ কৰি আৰ্দ্ৰভূমি আৰু ইয়াৰ গুৰুত্ব সম্পৰ্কত সচিত্ৰ উপস্থাপন কৰে৷

অনুষ্ঠানৰ লগত সংগতি ৰাখি ছাত্ৰ-ছাত্ৰীৰ মাজত এখনি মুকলি কুইজ প্ৰতিযোগিতা অনুষ্ঠিত কৰা হয়৷

আজিৰ অনুষ্ঠানত শিৱসাগৰৰ অনাৰেৰী ৱাইল্ড লাইফ ৱাৰ্ডেন দেৱজিত দেউৰী, বালিকুৰ গাঁওৰক্ষী বাহিনীৰ  সভাপতি খগেন য়েইন, সম্পাদক উমেশ পাংগিং দলপা গাঁওৰক্ষী বাহিনীৰ সভাপতি দেৱৰাম মিলি, সম্পাদক তৰুণ টায়ে, আৰণ্যক মনজিত কোৱঁৰ আৰু চৰকাৰী গাঁওবুঢ়া দিপন্ত টায়ে উপস্থিত থাকে৷

বালিকুৰৰ দৰে পিচপৰা এটা অঞ্চলৰ ছাত্ৰ-ছাত্ৰীৰ মাজত বিশ্ব আৰ্দ্ৰভূমি দিৱস উদযাপন কৰাৰ বাবে বিদ্যালয়ৰ প্ৰধান শিক্ষক গনেশ চন্দ্ৰ য়েইনে ‘আৰণ্যক’ক আন্তৰিক ধন্যবাদ জ্ঞাপন কৰে ৷