অগ্নিবীৰক বচাবলৈ জাপ দিলে নদীত; ছিকিমত মৃত্যু ৬ মাহ পূৰ্বে যোগদান কৰা সেনা বিষয়া শশাংকৰ

মাত্ৰ ৬ মাহ পূৰ্বে ভাৰতীয় সেনাবাহিনীত যোগদান কৰিছিল লেফটেনেণ্ট শশাংক তিৱাৰীয়ে। কিন্তু মাত্ৰ ২৩ বছৰ বয়সতে তেওঁ গুচি যাব লগা হ’ল উভতি নহাৰ দেশলৈ। নাই, শত্ৰুৰ বিৰুদ্ধে যুঁজত নহয়। সহকৰ্মীৰ প্ৰাণ ৰক্ষা কৰিবলৈ গৈ শ্বহীদ হ’ল শশাংক। এই মৰ্মান্তিক ঘটনা সংঘটিত হৈছে ছিকিমত।

ছিকিমৰ এটা সেনা ঘাটিৰ পৰা ৰুট অপেনিং পেট্ৰোলিংৰ বাবে ছিকিম স্কাউটৰ এটা দলে ৰাওনা হৈছিল। ইয়াৰ নেতৃত্বত আছিল শশাংক। সেই দলতে আছিল অগ্নিবীৰ ষ্টিফেন চুব্বা। শুকুৰবাৰে পুৱা প্ৰায় ১১ বজাত খৰস্ৰোতা নদীৰ ওপৰত এখন কাঠৰ দলং পাৰ হৈ গৈ থকা অৱস্থাত সংঘটিত হয় এই দুৰ্ঘটনা। চুব্বা পিছলি গৈ নদীত পৰিল। শশাংক আৰু তেওঁৰ দলৰ নায়ক পুকৰ কাটেল নামৰ আন এজন সৈনিকে লগে লগে তেওঁক বচাবলৈ নদীত জপিয়াই পৰে।

বহু সময় চেষ্টাৰ অন্তত পুকৰ আৰু চুব্বাক নদীৰ পৰা উদ্ধাৰ কৰা হয় যদিও শশাংকক উদ্ধাৰ কৰিব পৰা নগ’ল। নদীৰ প্ৰচণ্ড সোঁতে তেওঁক উটুৱাই লৈ গ’ল। দলৰ বাকী সৈনিকসকলে তেওঁক বিচাৰি সময় নষ্ট নকৰিলে। অৱশ্যে শশাংকক বিচাৰি উলিয়াবলৈ ৩০ মিনিট সময় লাগিল। দুৰ্ঘটনাস্থলীৰ পৰা ৮০০ মিটাৰ দূৰত উদ্ধাৰ কৰে সেনা বিষয়াজনৰ মৃতদেহ। তেওঁক বচোৱা সম্ভৱ নাছিল।

ভাৰতীয় সেনাই শশাংকৰ এই সাহসিকতাৰ বাবে প্ৰশংসা কৰিছে। ত্ৰিশক্তি কৰ্পছে ছ’চিয়েল মিডিয়াত পোষ্ট কৰি লিখিছে, “লেফটেনেণ্ট শশাংক তিৱাৰীয়ে ইমান কম বয়সতে এৰি থৈ যোৱা অসাধাৰণ সাহস আৰু সৌহাৰ্দ্যৰ উদাহৰণে ভৱিষ্যত প্ৰজন্মক বহু কথা শিকাব। আমি তেওঁক লৈ গৌৰৱান্বিত।” এই ঘটনাৰ খবৰ শুনি শশাংকৰ পৰিয়ালটো স্বাভাৱিকতে শোকত ভাগি পৰে।