চাপৰত যুৱকৰ ৰহস্যজনক মৃত্যু, অবৈধ খননকে দূষিলে বহুতে

ধুবুৰী জিলাৰ অন্তৰ্গত চাপৰ চহৰৰ কাজিপাৰা আৰু সত্যপুৰ গাওঁৰ মাজৰ অংশত অৱস্থিত প্ৰসিদ্ধ শালিভুই নামে পথাৰত এটা প্ৰকাণ্ড পুখুৰী সদৃশ গাঁতৰ পৰা আজি অভিজিত মেধি নামৰ ২৩ বছৰীয়া এগৰাকী যুৱকৰ মৃতদেহ উদ্ধাৰ হোৱাত অঞ্চলটোত গভীৰ শোকৰ ছাঁ পৰাৰ লগতে তীব্ৰ চাঞ্চলৰ সৃষ্টি হৈছে।

জানিব পৰা মতে শালি খেতিৰ কঠিয়া পৰাৰ বাবে ছাতি আৰু চাইকেল লৈ ট্ৰেক্টৰ বিচাৰি ঘৰৰ পৰা ওলাই আহি বহু পলম লৈকে উভতি নহা দেখি পৰিয়ালৰ লোকে চিন্তিত হয় আৰু যুৱক জনক বিচাৰি বহুতোকে সোধ পোছ কৰে।
এনেতে উক্ত শালিভুইৰ কিছু আঁতৰত চাইকেল আৰু  দ খাৱৈৰ কাষত তাৰ ছাতি দেখি উক্ত খাৱৈত বিচাৰিব ধৰোতে অভিজিতৰ মৃত শৰীৰ উদ্ধাৰ হয়।

উল্লেখ্য  বৰষুণৰ ফলত উক্ত পথাৰ পানীৰে ভৰি পৰিছে। ইপিনে উক্ত খাৱৈ পানীৰে পৰিপূৰ্ণ হৈ পৰিছে।
ৰাইজে অভিযোগ কৰি কয় যে অবৈধ ভাবে যধে মধে খনন কাৰ্য সম্পাদন কৰাৰ বাবে এই প্ৰকাণ্ড খাৱৈটোৰ সৃষ্টি হৈছে।

নৱ নিৰ্মিত ৰেলৱে লাইনৰ কাষত তথা শালীভুইৰ উক্ত স্থান  খনন কৰোঁতে চৰকাৰী সকলো নীতি নিয়ম পালিত  হৈছিল নে বুলি প্ৰশ্ন উত্থাপন হৈছে।

কাৰণ চাপৰ অঞ্চলত অবৈধ আৰু গোপন বুজা বুজিৰ মাজেৰে বিভিন্ন ঠাইত মাটি খনন কৰা হৈছে।

বন বিভাগৰ লোক ধৃতৰাষ্ট্ৰৰ ভূমিকা পালন কৰি থাকে। এই খনন কাৰ্যৰ বাবে সৃষ্টি হোৱা প্ৰকাণ্ড খাৱৈ ৰ বাবে অভিজিত নামে যুৱক জনৰ মৃত্যু হৈছে বুলি বহুতে সন্দেহ কৰিছে। উদ্ধাৰ হোৱাৰ পিছত যুৱক জনৰ মৃতদেহ চাপৰ থানালৈ  অনা হয়।

কাইলৈ  মৰণোত্তৰ পৰীক্ষাৰ বাবে প্ৰেৰণ কৰা হব বুলি চাপৰ থানাৰ ভাৰপ্ৰাপ্ত আৰক্ষী বিষয়া প্ৰণৱ দলেই জানিবলৈ দিছে। সত্যপূৰ গাওঁৰ বাসিন্দা আমিও কুমাৰ মেধিৰ পুত্ৰ অভিজিত মেধি অতি সহজ সৰল যুৱক আছিল । অভিজিতৰ মৃত্যুত বিভিন্ন জনে গভীৰ শোক প্ৰকাশ কৰিছে লগতে চাপৰ , সত্যপুৰ আদি অঞ্চলত  গভীৰ শোকৰ ছাঁ পৰিছে।