বিশ্বজুৰি ১৭ কোটি টকাৰ ওপৰত উপাৰ্জন; দশম দিনটোত কিমান আয় জুবিনৰ ‘ৰৈ ৰৈ বিনালে’ৰ?

যোৱা ৩১ অক্টোবৰত অসমৰ প্ৰাণৰ শিল্পী জুবিন গাৰ্গৰ অন্তিমখন ছবি ‘ৰৈ ৰৈ বিনালে’ মুক্তি লাভ কৰে। এই ছবিখন ঠিক সেই সময়তে মুক্তি পাইছে যেতিয়া কণ্ঠশিল্পীগৰাকীৰ মৃত্যুক লৈ অসম অস্থিৰ হৈ পৰিছে। ছবিখন মুক্তি পোৱাৰ প্ৰথম দিনাৰ পৰাই সমগ্ৰ ৰাজ্যতে ছবিখনক লৈ উন্মাদনা তুংগত আছে।

জুবিনৰ অনুৰাগীসকলে নিজৰ প্ৰিয় কণ্ঠশিল্পীগৰাকীৰ চিনেমা চাবলৈ ফুলৰ মালা লৈ চিনেমা হললৈ আহিছে। অসমৰ প্ৰতিটো হল ঘৰ ভৰ্তি হৈ আছে।

ৰাজেশ ভূঞাৰ পৰিচালনা আৰু গৰিমা গাৰ্গ আৰু জুবিনৰ প্ৰযোজনা এই ছবিখন ইতিমধ্যে অসমীয়া চলচ্চিত্ৰ ইতিহাসৰ অন্যতম উপাৰ্জনকাৰী অসমীয়া ছবি হিচাপে বিবেচিত হৈছে।

SACNILKৰ তথ্য অনুসৰি ষষ্ঠ দিনত ‘ৰৈ ৰৈ বিনালে’ই ১.৫ কোটি, সপ্তম দিনত ১.৩৩ কোটি, অষ্টম দিনত ১.০৬ কোটি, নৱম দিনত ১.৩৯ কোটি আৰু দশম দিনত ১.৫৪ কোটি টকা উপাৰ্জন কৰে। ছবিখনে দৰ্শকৰ সমাদৰ লাভ কৰাৰ লগতে অসমৰ আটাইকেইটা হল প্ৰায় হাউছফুল।

বিশ্বজুৰি ছবিখনে কিমান উপাৰ্জন কৰিলে? SackNilk ৰ তথ্য অনুসৰি বিশ্বজুৰি ৰৈ ৰৈ বিনালেই ১৭.৯৫ কোটি টকা উপাৰ্জন কৰিছে। ভাৰতত এই ছবিখনে এই পৰ্যন্ত ১৫.৪৭ কোটি টকা উপাৰ্জন কৰিছে। আনকি ৰৈ ৰৈ বিনালে মুক্তি পোৱাৰ পূৰ্বেও শিল্পীগৰাকীৰ অনুৰাগীসকল ছবিখনক লৈ উৎসাহী হৈ পৰিছিল।

৩১ অক্টোবৰত মুক্তিৰ দিনটোত ৰৈ ৰৈ বিনালেই ডেৰ কোটি টকাৰ ব্যৱসায় কৰিছিল। দৰ্শকৰ বিপুল চাহিদাৰ বাবে জুবিন গাৰ্গৰ শেষৰখন ছবিৰ আগত বলীউড আৰু দক্ষিণৰ দুখন বিগ বাজেটৰ ছবি পিছুৱাই যাবলৈ বাধ্য হয়।

পাঁচ কোটি টকাৰ বাজেটৰ ছবিখনে অধিক ধন উপাৰ্জন কৰাৰ সম্ভাৱনা আছে। অসমৰ বাহিৰেও দেশৰ আন আন ৰাজ্যতো দেখা গৈছে দৰ্শকৰ ভিৰ। ছবিখন চাই থাকোঁতে দৰ্শকে প্ৰয়াত প্ৰাণৰ শিল্পী জুবিন গাৰ্গৰ বাবে চকুলো টুকিছে। জুবিনৰ শেষৰখন ছবিৰ বৰ্তমানৰ স্থিতিয়ে ইংগিত দিয়ে যে এই ছবিখনে অতি সোনকালে কিছুমান ডাঙৰ অভিলেখ সৃষ্টি কৰিবলৈ ওলাইছে। কোৱা বাহুল্য যে এই ছবিখনে বক্স অফিচত কেইবাখনো বিগ বাজেটৰ ছবিক অতিক্ৰম কৰি যাব।