অংগৰাগ মহন্তৰ চুম্বন কাণ্ড ৰাষ্ট্ৰীয় প্ৰেক্ষাপটত : নিজৰ টুইটত পাপনৰ শাস্তি দাবী কৰিলে সুব্ৰমণিয়ন স্বামীয়ে

ৰিয়েলিটি শ্ব’ এটাৰ শ্বুটিঙৰ সময়ত পাপন অংগৰাগ মহন্তই এজনী নাবালিকাক আপত্তিজনকভাৱে চুমা খোৱা ঘটনাটোৱে এতিয়া ব্যাপক চৰ্চা লাভ কৰিছে ৰাষ্ট্ৰীয় প্ৰেক্ষাপটত। কেইবাটাও ৰাষ্ট্ৰীয় বৈদ্যুতিন সংবাদ মাধ্যমে গুৰুত্বসহকাৰে প্ৰচাৰ কৰিছে এই ঘটনাটোৰ বাতৰি।

প্ৰায়বোৰ ৰাষ্ট্ৰীয় সংবাদ মাধ্যমে পাপনৰ আচৰণ আপত্তিকৰ বুলি মত প্ৰকাশ কৰা দেখা গৈছে। সংবাদ মাধ্যমৰ লগতে ফেচবুক, টুইটাৰৰ দৰে ছ’চিয়েল মিডিয়াতো পাপনৰ এই কাণ্ডৰ ব্যাপক চৰ্চা হৈছে। সততে বিতৰ্কিত মন্তব্য দি ভাল পোৱা, বিজেপি দলৰ ৰাজ্যসভাৰ সাংসদ তথা প্ৰাক্তন কেন্দ্ৰীয় মন্ত্ৰী সুব্ৰমণিয়ন স্বামীয়ে নিজৰ টুইটত পাপনক ‘পাপী পাপন’ আখ্যা দিয়াৰ লগতে তেওঁৰ বিৰুদ্ধে বলাৎকাৰৰ অভিযোগত বিচাৰ চলাব পাৰি বুলি মন্তব্য কৰিছে।

আনহাতে নাবালিকা ছোৱালীজনীৰ প্ৰতি পাপনৰ আচৰণ মুঠেই গ্ৰহণযোগ্য নহয়, বৰং আপত্তিকৰ বুলি বেছিভাগ আইনী বিশেষজ্ঞই মত প্ৰকাশ কৰিছে। লগতে স্বামীৰ টুইটটোৰ ৰি-টুইট কৰাসকলৰ বেছিভাগেই তেওঁৰ বক্তব্যক সমৰ্থন কৰা দেখা গৈছে।

উল্লেখযোগ্য যে যোৱা ২০ ফেব্ৰুৱাৰিত অসমৰ নৱ প্ৰজন্মৰ মাজত বেচ জনপ্ৰিয় গায়ক পাপন অংগৰাগ মহন্তই এটা ৰিয়েলিটি শ্ব’ৰ শ্বুটিঙৰ সময়ত শ্বুটিঙত ভাগ লৈ থকা শিশু শিল্পীসকলৰ মাজৰ এজনী নাবালিকাক জোৰ কৰি চুমা খোৱাৰ ভিডিঅ’ এটা ছ’চিয়েল মিডিয়াত ভাইৰেল হৈ পৰিছিল।

ইয়াকে লৈ বিভিন্ন মাধ্যম আৰু বিভিন্ন স্তৰত তীব্ৰ বিতৰ্কৰ সূত্ৰপাত হৈছে। ইয়াৰ মাজতে পাপনৰ আচৰণ যৌন উৎপীড়নৰ সম পৰ্য্যায়ৰ বুলি দাবী কৰি উচ্চতম ন্যায়ালয়ৰ এগৰাকী অধিবক্তা ৰুণা ভূঞাই The Protection of Children from Sexual Offences Act ৰ অধীনত ব্যৱস্থা গ্ৰহণৰ দাবী জনাই national commission for protection of child rights ৰ অধ্যক্ষলৈ অভিযোগপত্ৰ প্ৰেৰণ কৰিছে।