অৰুণাচল প্ৰদেশৰ নামছাই জিলাৰ চংখাম অঞ্চলৰ এমপঙ গাওঁৰ এগৰাকী ১৩ বছৰীয়া কিশোৰীক কোনো অচিনাক্তই ধৰ্ষণ কৰি হত্যা কৰাৰ ঘটনা সংঘটিত হোৱাৰ পিছত বুধবাৰে মুখ্য মন্ত্ৰী প্ৰেমা খাণ্ডুৱে জিলা প্ৰশাসন আৰু আৰক্ষীক তদন্ত ক্ষীপ্ৰতৰ কৰি তুলি ধৰ্ষণকাৰী কেইজনক কৰায়ত্ত কৰিবলৈ নিৰ্দেশ দিয়ে। মুখ্য মন্ত্ৰীয়ে এনে ঘটনাক নিন্দাকৰাৰ উপৰি এনে অমানৱীয় কাণ্ড সংঘটিত কৰা লোককেইজনৰ মানসিক অৱস্থাৰ বিষয়েও প্ৰশ্ন উথ্থাপণ কৰে। এই নাৰকীয় কাণ্ড সংঘটিত কৰা পাষাণ কেইজনক অতি সোনকালে কৰায়ত্ত কৰি যাৱতীয় শাস্তি বিহা হ’ব বুলি মুখ্য মন্ত্ৰী খাণ্ডুৱে জনায়। তেওঁ লগতে কয় যে প্ৰশাসনৰ প্ৰতি বিশ্বাস ৰাখিবলৈ হ’লে আমি অতি সোনকালে দোষীক কৰায়ত্ত কৰিব লাগিব। জঘন্য কাণ্ডৰ বলি হোৱা কিশোৰীগৰাকীৰ প্ৰতি শ্ৰদ্ধা জনায় দুৰ্ভগীয়া পৰিয়াললৈ সমবেদনা জ্ঞাপন কৰে মুখ্য মন্ত্ৰী প্ৰেমা খাণ্ডুয়ে।
ৰাজ্যত নাৰীৰ ওপৰত অভাৱনীয় হাৰত বৃদ্ধি পোৱা দুস্কাৰ্যমূলক ঘটনাৰ বিৰুদ্ধে অৰুণাচল প্ৰদেশ মহিলা কল্যাণ সমাজে উদ্বেগ প্ৰকাশ কৰাৰ লগতে ঘটনা সন্দৰ্ভত আৰক্ষীয়ে দোষীক কৰায়ত্ত কৰি ৰ্বিহিত ব্যৱস্থা গ্ৰহণ কৰাৰ বাবে ৰাজ্য চৰকাৰৰ ওচৰত অনুৰোধ জনোৱা বুলি সংবাদ মাধ্যমৰ আগত জানিবলৈ দিয়। ইয়াৰ উপৰি এই সংগঠনটোৱে সকলো লোককে দুৰ্ভগীয়া পৰিয়ালটোৰ সৈতে ন্যায় প্ৰাপ্তিৰ বাবে থিয় হ’বলৈ আহ্বান জনায়। আনহাতে সদৌ অৰুণাচল প্ৰদেশ ছাত্ৰ সন্থাৰ ফালৰ পৰাও শ্ৰদ্ধা জ্ঞাপন কৰে।
