আলফাই আজি কেই মুহূৰ্তমানৰ পূৰ্বে অপহৃত অৰ্ণৱক স্বেচ্ছাই এৰি দিয়া বুলি আমালৈ এইমাত্ৰ খবৰ আহিছে। সূত্ৰটোমতে অপহৰণকাৰীয়ে অৰুণাচলৰ লংভি নামৰ ঠাইত অৰ্ণৱক এৰি থৈ যায়। মুক্তি পোৱাৰ পিছতে অৰ্ণৱে প্ৰথমে মাকলৈ ফোন কৰি নিজৰ অৱস্থিতিৰ বিষয়ে জনায়। পিছত আৰক্ষীয়ে অৰ্ণৱক জয়ৰামপুৰৰ কমিউনিটি হেল্থ চেণ্টাৰলৈ স্বাস্থ্য পৰীক্ষা কৰোৱাবলৈ নিয়া বুলি জানিব পৰা গৈছে। সূত্ৰটোৱে কোৱা মতে অৰ্ণৱৰ কোনো বিশেষ শাৰীৰিক ক্ষতি হোৱা চকুত পৰা নাই।
উল্লেখযোগ্য যে যোৱা ১৫ ডিচেম্বৰত তিনিচুকীয়া অঞ্চলৰ ব্যৱসায়ী দিলীপ ফুকনৰ পুত্ৰ অৰ্ণৱক আলফাৰ এটা পাঁচজনীয়া দলে অৰুণাচলৰ এটা ব্যৱসায়ৰ স্থানৰ পৰা অপহৰণ কৰিছিল। যোৱা কিছু দিন লৈ অৰ্ণৱ ফুকনৰ অপহৰণ কাণ্ডই অসমৰ জনসাধাৰণৰ লগতে আৰক্ষী মহলতো যথেষ্ট আলোড়নৰ সৃষ্টি কৰিছিল। মাত্ৰ দুদিন পূৰ্বে তিনিচুকীয়া জিলাৰ আৰক্ষী অধীক্ষক মুগ্ধজ্যোতি মহন্তই অৰ্ণৱৰ মুক্তিৰ দাবীত আলফাই দেউতাকৰ পৰা ৩ কোটি টকা দাবী কৰা বুলি সংবাদ মাধ্যমৰ আগত মন্তব্য কৰাৰ লগতে অৰ্ণৱৰ দেউতাকে সেই কথা আৰক্ষীৰ পৰা লুকুৱাই ৰাখিছে বুলি কৈছিল। লগতে আৰক্ষী অধীক্ষকজনে অৰ্ণৱৰ অৱস্থিতি বৰ্তমান ম্যানমাৰৰ পাপুম গাৱঁত বুলি কৈছিল।
তাৰ পিছতে আজি আলফাই অপহৃত যুৱকজনক মুক্তি দিয়াটোৱে ৰহস্যৰ সৃষ্টি কৰিছে। বহুতে অৰ্ণৱৰ মুক্তিৰ বাবে দেউতাকে আলফাক যথেষ্ট মুক্তিপণ দিয়া বুলি সন্দেহ কৰিছে।
উল্লেখযোগ্য যে যোৱা এবছৰ মান আগতে কুলদীপ মৰাণ নামৰ আন এজন যুৱককো আলফাই একেদৰে অপহৰণ কৰিছিল আৰু পিছত একেই ধৰণে মুকলি কৰি দিছিল।
