অহা নতুন বছৰৰ ফেব্ৰুৱাৰীত আমচাং বনাঞ্চলত পুনৰ উচ্ছেদ অভিযান আৰম্ভ কৰিব চৰকাৰে। এখন আবেদন যোগে গুৱাহাটী উচ্চ ন্যায়ালয়ক এই কথা জনাইছে ৰাজ্য চৰকাৰে। মানবীয় দৃষ্টিকোণৰ পৰা নৱেম্বৰৰ শেহৰ ফালে উচ্ছেদ অভিযান স্থগিত ৰাখি দুমাহৰ সময় বিচাৰিছিল চৰকাৰে। কিন্তু অবৈধ বেদখলৰ বিৰুদ্ধে এই অভিযান এতিয়া পুনৰ আৰম্ভ কৰাৰ কথা ন্যায়ালয়ক অৱগত কৰিছে আৰু ফেব্ৰুৱাৰীৰ পৰাই উচ্ছেদ অভিযান আৰম্ভ কৰাৰ কথাও চৰকাৰে উল্লেখ কৰিছে।
উচ্চ ন্যায়ালয়ে ৰাজ্য চৰকাৰৰ আবেদনত অনুমোদন জনাইছে। তদুপিৰ, আমচাঙত চলোৱা উচ্ছেদৰ বাবে চৰকাৰৰ প্ৰশংসাও কৰিছে ন্যায়ালখনে। যোৱা নৱেম্বৰৰ শেহৰফালে চলাই থকা উচ্ছেদ কাৰ্যই বিভিন্ন মহলত প্ৰতিক্ৰিয়াৰ সৃষ্টি কৰাৰ পিছত মানবীয় দৃষ্টিকোণৰ ফালৰ পৰা বিবেচনা কৰি চৰকাৰে উচ্ছেদ কাৰ্য সাময়িকভাৱে স্থগিত ৰখাৰ আৰ্জি জনাই ন্যায়ালয়ৰ পৰা উচ্ছেদিতসকলক পুনৰ সংস্থাপনৰ বাবে দুমাহ সময় বিচাৰিছিল।
উচ্চ ন্যায়ালয়ে অনুমোদন জনোৱা আবেদনৰ সময়সীমা অহা ৩১ জানুৱাৰীত উকলি যাব। চৰকাৰে ন্যায়ালয়ক ফেব্ৰুৱাৰীত পুনৰ আমচাঙত উচ্ছেদ কাৰ্য চলাব বুলি লিখিতভাৱে জনাইছে। কিন্তু ফেৱ্ৰুৱাৰীত উচ্ছেদ অভিযান আৰম্ভ হ’লে পুনৰ এক অপ্ৰীতিকৰ পৰিস্থিতিৰ সৃষ্টি হোৱাৰ সম্ভাৱনা আছে। কিয়নো চৰকাৰে প্ৰতিশ্ৰুতি দিয়া অনুসৰি উচ্ছেদিতসকলক পুনৰ সংস্থাপিত কৰিবলৈ সক্ষম হোৱা নাই।
উচ্চ ন্যায়ালয়ে আমচাঙৰ একাংশ উচ্ছেদিত লোকে দাখিল কৰা এখন লেখ আবেদনৰ শুনানি গ্ৰহণ কৰি মুখ্য ন্যায়াধীশ অজিত সিং আৰু ন্যায়াধীশ মনজিত ভূঞাৰ বিচাৰপীঠে আমচাং বনাঞ্চল অবৈধ বেদখলমুক্ত কৰাৰ নিৰ্দেশ জাৰি কৰে। পূৰ্বতে আৰ্লি বাৰ্ডছ নামৰ স্বেচ্ছাসেৱী সংগঠন এটাই দাখিল কৰা এখন ৰাজহুৱা স্বাৰ্থজনিত আবেদনৰ ৰায় প্ৰদান কৰি আমচাং অভয়াৰণ্যৰ অবৈধ দখলকাৰীক উচ্ছেদৰ নিৰ্দেশ দিছিল ন্যায়ালয়ে।
