অৰুণাচল প্ৰদেশৰ প্ৰথমগৰাকী আইপিএছ আইজিপি ৰবীন হিবুয়ে উত্তৰ-পূবৰ অসহায় জনসাধাৰণক সেৱা আগবঢ়াব বিচাৰে।
হিবুয়ে তেওঁলোকৰ মাজত সজাগতা সৃষ্টিৰে সবলীকৰণ কৰি তোলাৰ লগতে তেওঁলোকক জৰুৰীকালীন আইনী সাহায্য আৰু সেইদৰে স্বাস্থ্যসেৱা আৰু শিক্ষাৰ সা-সুবিধা আগবঢ়োৱাৰ চিন্তা ব্যক্ত কৰিছে।
২০১৭-১৮ বৰ্ষত দ্বিতীয়বাৰৰ বাবে ভাৰতৰ ৰাষ্ট্ৰপতিৰ বিশিষ্ট সেৱা পদক অলপতে নতুন দিল্লীত গৃহমন্ত্ৰী ৰাজনাথ সিঙৰ পৰা গ্ৰহণ কৰা হিবুয়ে কয়, ‘’ মই দ্বিতীয়বাৰৰ বাবে ভাৰতৰ ৰাষ্ট্ৰপতিৰ বিশিষ্ট সেৱা পদকেৰে সন্মানিত হৈ অতি আহ্লাদিত অনুভৱ কৰিছো। আন্তৰিক অভিনন্দন অসংখ্য শুভেচ্ছা আৰু প্ৰাৰ্থনাই মোক অধিক কাম কৰাৰ শক্তি তথা প্ৰেৰণা দিয়ে।‘’
এতিয়ালৈকে অত্যন্ত প্ৰত্যাহ্বানমূলক পৰিস্থিতি অতিক্ৰম কৰি অহা হিবুয়ে উত্তৰ-পূৰ্বাঞ্চলৰ দুৰ্ভগীয়া লোকসকলক সেৱা আগবঢ়োৱাৰ বাবে অতি আগ্ৰহী। তেওঁ এই লোকসকলৰ বাবে আইনী সেৱাকে ধৰি স্বাস্থ্যসেৱা তথা শিক্ষাৰ সা-সুবিধাসমূহ যাতে এই অঞ্চলৰ পিছপৰা লোকসকলে লাভ কৰিব পাৰে তাৰ বাবে সজাগতা সৃষ্টিৰ ওপৰত গুৰুত্ব আৰোপ কৰিছে।
এইটো নিসন্দেহে এক বিৰল সন্মান যে কোনোবা ব্যক্তিয়ে পুনৰ দ্বিতীয়বাৰৰ বাবে ভাৰতৰ ৰাষ্ট্ৰপতিৰ বিশিষ্ট সেৱা পদক লাভ কৰিছে।
বিশিষ্ট সেৱাৰ বাবে ভাৰতৰ প্ৰথম ৰাষ্ট্ৰপতি পদক তেওঁক ২০০৯-২০১০ চনত আগবঢ়োৱা হৈছিল। পূৰ্বতে হিবুৱে তেওঁৰ বিশেষ সেৱাৰ বাবে ২০১০ত আৰক্ষী পদক লাভ কৰাৰ উপৰি ২০০৩ আৰু ২০০৯ বৰ্ষত দুবাৰকৈ স্বৰ্ণ পদক লাভ কৰিছিল।
