ত্ৰিপুৰাত চি পি আই (এম)ৰ আৰাধ্য কমিউনিষ্ট বীৰ নেতাসকলৰ মূৰ্তি ভঙাত অভিযুক্ত নতুন শাসক হিন্দুত্ববাদী, সোঁপন্থী বিজেপিয়ে এইবাৰ পুনৰ নিৰ্মাণ কৰিবলৈ ওলাইছে কমিউনিষ্ট নেতা বৈদ্যনাথ মজুমদাৰৰ ভগ্ন মূৰ্তি|
মুখ্য মন্ত্ৰী বিপ্লব কুমাৰ দেবে আজি ২৮ জুলাইত আগৰতলাত এই কথা সদৰী কৰিছে।
‘(বিজেপি) দলৰ পুঁজিৰে মূৰ্তিটো পুনৰ নিৰ্মাণ কৰিবলৈ মই কয়লাচহৰৰ দলীয় নেতাসকলক আহ্বান জনাইছো। এইক্ষেত্ৰত ৰাজ্য চৰকাৰে সহায় আগবঢ়াব,’ দেবৰ মন্তব্য।
ভাৰতৰ স্বাধীনতা সংগ্ৰামী কমিউনিষ্ট নেতাজনৰ উনাকতি জিলা সদৰ কয়লাচহৰত থকা বৃহৎ মূৰ্তিটো যোৱা বুধবাৰে ভঙাৰ পিছতে শাসকীয় বিজেপি তীব্ৰ সমালোচনাৰ সন্মুখীন হ’ব লগা হৈছিল।
সমালোচনাৰ পিছতে ‘মূৰ্তি ভঙাটো বিজেপিৰ সংস্কৃতি নহয়’ বুলি দাবী কৰি মুখ্য মন্ত্ৰীজনে ঘটনাটোৰ তদন্তৰ বাবে ৰাজ্যৰ আৰক্ষী সঞ্চালক প্ৰধানক নিৰ্দেশ দিয়া বুলি প্ৰকাশ কৰিছে।
‘ডি আই জি (উত্তৰ মণ্ডল)ক ঘটনাথলীলৈ পঠিয়াবলৈ আৰু ঘটনাটোৰ তদন্ত কৰিবলৈ আৰক্ষী সঞ্চালক প্ৰধান অখিল কুমাৰ শুক্লাক মই নিৰ্দেশ দিছো,’ দেবৰ দাবী।
‘ঘটনাটোৰ আঁৰত থকা কাকো সাৰি যাবলৈ দিয়া নহ’ব’ বুলি আশ্বাস দি দেবে লগতে কয়, ‘বিজেপি চৰকাৰৰ ভাবমূৰ্তি নষ্ট কৰিবৰ বাবে চলোৱা ষড়যন্ত্ৰৰ ই অংশ নেকি গম ল’বৰ বাবেও সঞ্চালক প্ৰধানক মই নিৰ্দেশ দিছো|’
ঘটনাত জৰিত থকাৰ সন্দেহত আৰক্ষীয়ে গ্ৰেপ্তাৰ কৰা লোক দুজনে যোৱা শুকুৰবাৰে জামিন লাভ কৰিছে।
মূৰ্তিটো ‘বিজেপিৰ গুণ্ডা’ই ভাঙিছে বুলি চিপিআই (এম) নেতা বিশ্বৰূপ গোস্বামীয়ে কৰা দাবী বিজেপিয়ে অগ্ৰাহ্য কৰিছে। মূৰ্তি ভঙা ঘটনাৰ তদন্ত বিচাৰি চিপিআই (এম)এ যোৱা তিনিদিন ধৰি ৰাজ্যখনত প্ৰতিবাদ কৰি আহিছে।
কংগ্ৰেছ, চিপিআই (এম)ৰ লগতে বিজেপিয়েও নেতাজনৰ মূৰ্তি ভঙা ঘটনাটোক গৰিহণা দিছিল।
বিভিন্ন কমিউনিষ্ট নেতাৰ মূৰ্তি ভঙা বুলি দেশজুৰি সমালোচিত হোৱা বিজেপিয়ে অভিযোগসমূহ খণ্ডন কৰি আহিছিল।
ত্ৰিপুৰাত কমিউনিষ্ট দলৰ অন্যতম ভেটি স্থাপনকাৰী নেতা, ২০১১ চনত মৃত্যু হোৱা মজুমদাৰ ১৯৩০ চনৰ চিতাগং অস্ত্ৰভাণ্ডাৰ লুটৰ ঘটনাত স্বাধীনতা যুঁজাৰু সূৰ্য্য সেনৰ অন্যতম সহযোগী আছিল।
